Обзерач Природы #22 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 26. лютого/фебруара 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Посмотрме на мапу Карпат. Маме Бескіды, маме Татры і деси медже нима втиснены Пєніны, в ґеолоґічным значыню Пєніньскє Скалкове Пасмо, котре глубоко під земльом тягне ся іщы дале на схід і захід на долгости більше як 600 кілометрів. Але чом бесіда на антені проґраму про Пєніны, як наша Лемковина находит ся на вельо дальше на схід? І то є правда, але прецін маме іщы маленьку Шляхтівску Русь і штырі села, што ся там находят – Шляхтову, Явіркы, Білу і Чорну Воду. Хоц днес на тій обшыри жыє лем пару русиньскых родин, то дале можеме чути тот климат давной Руси. В селах лишыли ся церкви і пару хыж, придорожны капличкы дале стоят, а убочы Пєнін, на котрых выпасало ся уці, сут такы самы як перед столітьом. І то як раз Русины зо Шляхтівской Руси мали недалеко до такых чудес як Яр Гомолі. Як раз там підеме на малу, ґеолоґічну прогульку. Будте з нами од 13.00 год.!

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.