Обзерач Природы #32 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 21. мая 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Уж од більше як 30 одтинків обзераме спільні природу. Смотріли сме на далекы закутины світа, як і одкрывали сме особливы природничы явиска. Тепер зачнеме нову мінісерию, в котрій призриме ся реґіонови барз близкому так Лемковині, як і самому ведучому проґрам. Бесіда буде про Сандеччыну. В дальшых одтинках «Обзерача Природы» посмотриме на тот реґіон з інчой стороны. В першым одтинку з того циклю призриме ся загальному ґеоґрафічному положыню Сандеччыны, тому, як ся она ділит на ріжны гірскы пасма, як і де має границі. Думате, же сте уж вшытко чули о тым? Слухайте проґрам і переконайте ся самы, же іщы вельо на Сандеччыні жде одкрытя!

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.