Обзерач Природы #38 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 10. вересня/септембра 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Вертаме, дорогы слухачы, по вакациях! Ведучый того проґраму має надію, же сте одпочали і уж сте готовы на другу серию природничых авдиций. В першым одтинку по перерві (хоц буде то докладні тридцет осмый одтинок, рахуючы од самого початку) поіхаме одраз за границю Польщы. Одвидиме Словенію і єй найбарже популярны яскыні. Постойнска Яскыня і Шкоцияньскы Яскыні – так ся называют дві найбільшы, до якых поіхаме. Призриме ся не лем ним, але тіж дознаме ся, чым сут карстовы явиска і в якы горы в Словеніі найліпше поіхати.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.