Обзерач Природы #46 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 5. листопада/новембра 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

В найблизшым одтинку «Обзерача Природы» поіхаме до Кытаю, а докладні до міста Нанкін, якє находит ся недалеко од Шанґгаю. Будеме вандрувати по старых скальнях і дознаме ся про іх історию, бо як ся вказує – уж од античных часів тоты околиці были славны з причыны великых покладів пісковця, якы експлоатуваны были долгы столітя. Ведучый проґрам постарат ся показати «одтиск пальців Матери Землі» найліпше як то на антені радия можливе. Конечні слухайте проґрам, бо буде то барз інтересуюча вандрівка.

А на головній знимці мож видіти єдну зо скален і тоты «одтискы», о котрых буде бесіда.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.