Обзерач Природы #54 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 31. грудня/децембра 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Як ся бесідує о вульканах в Західніх Карпатах, то в Польщы найчастійше подає ся пєніньскы Ярмуту і Гору Вджар, але якоси забыват ся, же Словация тіж має чым быти горда. В найблизшым одтинку нашого природничого проґраму поіхаме в околиці, што сут медже двома словацкыма містами – Зволеньом а Нітром. Там в долині Грону находит ся невеликій верх Путіків, з котрого іщы 100 тис. років тому ішла горяча лява! Лем 100 тис. років тому! Што порівнуючы до пєніньскых вульканів єст дост недавно. Путіків для Ярмуты ци Горы Вджар єст як молода дітина і як раз в його роках єст ціла його вынятковіст. Як хочете дознати ся більше про тот молодый вулькан на Словациі, конечні слухайте проґрам уж од 13.00 год.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.