Обзерач Природы #66 – пятниця, 13.00 год.

Вчый ся, вчый, бо наука то до силы ключ – так бесідує польскє прислівя. Перед столітями не все мали можливіст вчыти ся о правилах природы, зато як виділи великы, особливы скалы в лісах, то называли іх од дяволів. Так тіж было в припадку прекрасных Дявольскых Скал в селі Буковец в новосандецкым повіті, котрым призриме ся в найновшым одтинку Обзерача Природы.

То мале село на Рожновскым Погірю можеме без проблему назвати кінцьом світа – веде тади єдна дорога, не фунґує праві нияка автобусова комунікация, в центрі находит ся єден склеп і то вшытко. Натоміст під природничым взглядом єст вельо до експлоруваня. Місцевый резерват природы Дявольскы Скалы одкрыє перед нами парудесят ґеолоґічных примірів цєнжковицкых пісковиків, якы возникали перед мілийонами років. Дакотры з них мают до 15 метрів высоты!

Як мало Вам буде вандрівок в лабіринті скал, то іщы спрібуєме войти до єдной з найдолшых яскынь в Карпатах. Буковец то перлина, о котрій не каждый знат. Додайме іщы на конец, же в селі находит ся тіж… давна лемківска церков, яка по 1947 р. была перенесена з Камяной. Днеска єст хоснувана католиками.

Просиме слухати Обзерача Природы в найблизшу пятницю, 13. грудня/децембра, о 13.00 год. Одтинок буде повтаряный в суботу, 14. грудня/децембра о 7.00 год. і в віторок 17. грудня/децембра о год. 15.15. До стрічы на (радийовым) шляку!

джерело знимкы: приватный архів автора