Обзерач Природы #79 – пятниця, 13.00 год.

Узкы, скальны каньоны, глубокы жбыры, дикы лісы по сам горизонт і великы водопады – звучыт як опис даякой атракциі родом з Альп ци Піренеів? А бесіда о Яносіковых Дірах, комплексі жбырів, якій находит ся недалеко од Лемковины в пілнічній Словациі! То там в найновшым одтинку Обзерача Природы возму Вас на інтересуючу і полну адреналіны вандрівку.

Яносіковы Діры то єдна з головных атраций Малой Фатры – гірской ґрупы на словацкій Ораві. Слово «діры» в назві не бере ся без причыны. Скальны каньоны сут гев так узкы і глубокы, же давнійше людям явыли ся як великы діры в Земли. Соткы тисячів років вода створила в серци Фатры чудовы жбыры з десятками водопадів. Туристичны шлякы сут так побудованы, же часом треба іти аж по высокых драбинках пару метрів над корытом потока! В такых місцях серце міцнійше забє.

Слухайте конечні Обзерача Природы, жебы дознати ся більше о Яносіковых Дірах. Премєра одтинка в найблизшу пятницю 14. марця о 13.00 год. Проґрам буде повтаряный в суботу 15. марця о 7.00 год. та в віторок 18. марця о 15.15.

До стрічы на (радийовым) шляку!

джерело знимкы: приватный архів автора