Сердечні просиме слухати новый природничый проґрам на антені ЛЕМ.фм уж в найблизшу пятницю о год. 13.00. «Обзерач Природы» то нова пропозиция для любителів природы, лісовых звірят, вандрівок в незнане.
По тырваючій близко 2,5 рока подорожничій авдициі «Бескідник» пришол час, жебы од осени на антені ЛЕМ.фм появило ся дашто нове. В «Обзерачу Природы», як сама назва вказує, будеме обзерати, што ся діє в природі, подібні як з вежы для полювачів. Дознаме ся, як єлені ся паруют вчас рыковиска, одкрыєме секреты золотой осени, присмотриме ся, як жыют ріжны звірята, як і войдеме всередину Землі, жебы познати історию Карпат, а особливо Бескідів.
Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год. Проґрам тырват ок. 25-30 минут.
В першым одтинку присмотриме ся бобрам – звірятам, о котрых вельо ся днес бесідує, же сут шкодливы для діяльности чловека, але тіж барз помічны в утриманю правильной водной господаркы в середовиску. Яка є правда? Або де компроміс в іх справі? Слухайте проґрам уж 18. вересня/септембра 2020 р. о 13.00 год.
Коментарі