Од Кандрачовців і Пульсу до метальовой музыкы – «Добрий фестіваль» в Пряшові

Днес, т.є в пятницю 17. червця/юнія 2016 р., в Пряшові зачынат ся девята – а рахуючы з нульовом в 2007 р. – десята едиция фестівалю, званого просто «Добрым Фестівальом» (Dobrý festival). Як заявляют орґанізаторы, діапазон музычных жанрів і інчых супроводных акций в рамках фестівалю єст барз шырокій, понеже прибывшы на Добрий Фестіваль найдут там творчіст з обшыри гаус, драм&бейс, металь, поп, рок, джаз, але і народну музыку.

Але не лем ріжнорідна музыка буде доступна для присутных вчас зачынаючого ся днес дводньового фестівалю. Орґанізаторы зрыхтували пару сцен, шатер і обшыри, котры будут мати змогу одвидіти участникы:

• Обшыр доброй музыкы (Dobrá hudba – Good music stage),
• Шариш добра корчма (Šariš dobrá piváreň – Šariš good beer),
• Рокова сцена (Rockové podium – Rock stage),
• Танцувальне шатро (Tanečný stan – Dance tent),
• Фільмове шатро (Filmový stan – Movie tent),

Окрем выже спомненых, сут два дальшы просторы, в котрых будут ся одбывати другы подіі – Добры бойовникы (Dobrí bojovníci – Good fighters) – з презентацийом вельох видів бойовых спортів, і Діточий кутик – зона, в котрій потіху найдут найменьшы.

Посеред вельох акций, котры будут проходити в рамках Доброго Фестівалю, сут і русиньскы акценты. В Обшыри доброй музыкы выступлят добрі знаны на русиньскых сценах ансамблі Пульс і Кандрачовці, та інчы (напр. Жобраці), котры в своій істориі зачыпляли о русиньску творчіст. Професийональний ансамбль Пульс з Пряшова, котрий влони святкувал своє 60-літя, даст концерт днес (17.06.2016) о 16.30 год., а Кандрачовці – єдна з найбарже знаных на словациі капель, граючых народну (в тым і русиньску) музыку – выступит заран (18.06.2016) о 16.30 год.

Більше інформаций найдете на сайті орґанізаторів Доброго Фестівалю, а детальний проґрам находит ся за тым мотузком.