Голосник

«Од мая будут часовы выставы, тіж з участю лемківскых артистів». Музей Никыфора зас одкрытый

Од послідньой пятниці, 31. січня/януара 2020 рока, зас для вшыткых любителів никыфоровой творчости i туристів одкрытый є Музей Никыфора в Креници. «То є точно в 25. річницю одданя Музею Никыфора, такій малый юлівей маме» – спостерігат Збіґнєв Волянін, кустош музею.

Музей Никыфора в Креници отворено докладні 31. січня/януара 1995 рока, як одділіня Округового Музею в Новым Санчы. Од тамтой поры, аж і днес сідиба музею находит ся в вілли Романівка. В остатніх девятьох місяцях будинок комплексово ремонтувано. «Цілый шор робіт зроблено, але не лем тых звязаных з термомодернізацийом, чого тыкал проєкт. Ходило тіж о тото, жебы злегшыти неполносправным особам одвиджаня музею, сут підізды і інча інфраструктура в його середині» – бесідує З. Волянін.

Новы аранжациі

Зміны тыкают не лем самого будинку, але і експозициі. Мож видіти не лем найкрасшы творы Никыфора, але тіж тоты, котры николи скорше не были выставлюваны. «Сут зміны, єст нова аранжация експозициі, музей єст модерні заґаздуваный» – додає Збіґнєв Волянін. «Постійна выстава творчости Никыфора в цілым музею є в новій аранжациі, як і часова, а од мая будеме орґанізувати ріжны інчы часовы выставы, тіж з участю лемківскых артистів» – продолжат.

На постійну выставу складат ся 80 робіт, дальшых 40 входит в склад часовой, котра вказувана буде до мая тр. Окрем акварель, ґвашы, рисунків олівком і кредками презентуваны сут документы, знимкы, публикациі і особисты памяткы.

Новістю є «Ґалерия єдного образу», в рамках котрой што квартал презентуваный буде выбраный образ з шыршым описом. Як першый вказали «Потрійный Автопортрет», єден з найславнійшых творів Епіфана Дровняка.

Таблиці о Никыфорі тіж по лемківскы

По цілковитым ремонті вілля Романівка має нову аранжацию. В експозицийных салях введено кольоры стін і змодифікувано спосіб презентуваня образів – введено на постійній выставі два кольоры рам для акварель і ґвашы та два кольоры рам для рисунків олівком і кредками. Нову оправу достали тіж фотоґрафіі. Появилы ся таблиці з тлумачынями на анґлицкій язык, а перша таблиця о Никыфорі є тіж по лемківскы.

Змінено локалізацию некотрых експонатів, але ґенеральні схема поєдных выставовых поміщынь одповідат бывшій концепциі, автором котрой є Збіґнєв Волянін. В одновленій сали часовых выстав будут презентуваны выставы з обшыри примітивной штукы (art brut) та звязаны з історийом і традицийом малопольского уздоровиска.

Святочный вернісаж

Торжественный вернісаж одкрытя пройде 21. лютого/фебруара тр. при присутности запрошеных гости, в тым Маршалка Малопольского Воєвідства Вітольда Козловского. На подіі не бракне і лемківскых артистів, выступит м.ін. Петро Трохановскій та Юлия Дошня з ґрупом Руты Увіты. Про деталі вернісажу будеме інформувати.

Музей отвореный є од віторка до неділі. Без білетів мож входити в кажду неділю.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі