Одбуде ся юбілейна Червена ружа

Як інформує русиньска аґентура Рутенпрес, в днях 1-го і 2-го октобра 2016-го року буде проходити юбілейный 55-ый річник Фестівалу русиньской културы Червена ружа. Фестівал буде традічно проходити в Руськім Керестурі.

Найстаршый і найвекшый фестівал Русинів Войводины быв того року переложеный із традічного терміну, котрый є кінцьом юнія, на зачаток октобра із причіны смерти вызначного музиканта, композітора Юліяна Рамача Чамы.

Червена ружа того року першыраз буде проходити в Шпортовій галі в Руськім Керестурі. Фестівал штартує в суботу. Проґрам зачне выставков творів авторкы Андєлікы Антічевіч із Беркасова, по ній будуть слідовати музично-танечны выступліня дітей в проґрамі під назвов „Червене пупче“. Вечорный проґрам під назвов „Одгуки ровнїни“ зачне о 20.00 год. і представлять ся в рамках нього майже вшыткы русиньскы музично-фолклорны ансамблі з Войводины.

В неділю вже є на 17.00 год. напланованый проґрам „Червена ружа“ в рамках котрого ся традічно будуть змагати молоды співаци і співачкы русиньскых співанок. Фестівал буде о осмій годині вечур закінченый святочным концертом, в котрім выступлять русиньскы ансамблі із тым найліпшым зо свого репертоару.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА