Одбыла ся 26-та стріча русиньскых школ

В суботу 1-го юна 2024-го року одбыла ся  26-та стріча русиньскых школ, котра тот рік проходила в Хорватії. Стрічу орґанізовали Основна школа Антуна Бауера у Вуковарі і Подручна школа у Петровцях (малокласна підпорядкована школі у Вуковарі, позн. ред.). Інформує о тім аґентура Рутенпрес.

В Петровцях при тій нагоді одсвятковала ся 110-та річніця будинку школы і 30-та річніця од першой стрічі русиньскых школ у співпраці із Дружством про русиньскый язык, літературу і културу в Новім Саді, при підтримці Одділіня про освіту Націоналного совіту Русинів Сербії.

На стрічі брали участь школы із Руського Керестура, Коцура, Дюрдьова, Нового Саду, општины Шід, Кулы, Нового Орахова і Савиного Села, котрых привітав директор Основной школы Антуна Бауера Златко Міліч. Школярі із школы в Петровцях пририхтовали участным інтересный проґрам.

На стрічі были участны і представителька Дружства про русиньскый язык, літературу і културту Іріна Папуґа, Олена Папуґа за Одділіня про освіту Націоналного совіту Русинів, як і учітелькы із спомянутых школ.

Іріна Папуґа школі в Петровцях од Дружства про русиньскый язык, літературу і културу передала подарунок до школьской бібліотекы, книжкы, котры выдало Дружство. Подія в Петровцях продовжовала навщівов Ґрекокатолицькой церькви Покровы Пресвятой Богородіці, а пак участны ішли посмотрити Етноґрафічну експозіцію Русинів Хорватії.

Проґрам стрічі пак продовжовав навщівов Основной школы Антуна Бауера у Вуковарі, де школярі так само приготовили інтересный проґрам. Тогорічна стріча была закінчена навщівов Ґрекокатолицькой церькви Хріста Царя у Вуковарі, в котрій участны выслухали і інтересности о тій парохії, яка была основана у 1962-ім році.