Голосник

Одкрывают церкви для туристів

Лемківскы святыні, малопольскы скансены і музеі, якы находят ся на Пути Деревяной Архітектуры в Малопольщы зас отверают ся для туристів.

При дотриманю одповідніх принципів безпекы, в масочках, котры закрывают ніс і ґамбу, деревяны обєкты зас мож одвиджати. В звязку з тым, што простір каждого з них єст інчый, максимальне чысло осіб, якє може быти в середині (при захованю ліміту 15 квадратных метрів на особу) є ріжне – треба тримати ся рекомендаций опікунів обєктів.

Деревяны церкви з Малопольщы, якы находят ся на Списку Світовой Спадковины ЮНЕСКО, мож видіти в годинах: понедільок-віторок – скорше треба ся догварити, середа 9.00-17.00, четвер-субота 9.00-18.00, неділя 12.00-17.00. Церкви, котры мож обзерати, то храмы в Брунарах, Квятони, Рыхвалді і Поворознику.

Окрем того од початку того тыжня мож входити на обшыр більшости скансенів і одкрытых музеів на полудни Польщы, м.ін. на обшыр Мазярской Загороды в Лоси, Скансену Погіряньского Села в Шымбарку, грекокатолицкой церкви в Бортным (тепер єст то музейный обєкт), Сандецкого Етноґрафічного Парку в Новым Санчы, Музею Пчолярства в Стружах. Округовый Музей в Новым Санчы рыхтує ся тіж до удоступніня одділіня в Креници – Музею Никыфора.

В скансенах і музеях так само обовязуют ограничыня в чыслі приниманых туристів, треба быти осторожным, мати облечену масочку.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі