Одпрезентовали книгу співанок Олґы Прокоп

Як інформовав голова Русиньского културолоґічного клубу Юрій Шиповіч, 2-го юла 2023-го року в сельскім клубі в Нижній Грабовніці одбыла ся презентація книгы Русинські співанкы, котру позберала і упорядковала Олґа Прокоп.

Зборник співанок має 552 сторінок і книга вышла на кінцю юна того року у выдавательстві Карпати.

„Прощена бы Олґа Кіріловна зберала русиньскы співанкы цілый свій жывот і вірила, же скоріше або пізніше збірку выдають, і пісні послужать людям,“ написав Юрій Шиповіч.

Припомянув тот факт, же іщі почас жывота Олґы Прокоп, у 2020-ім році, даякуючі Русинам з Мадярьска, вышла часть співанок під єднаков назвов Русинські співанкы. У тім выданю были публікованы дітьскы і колысковы співанкы, як і коломыйкы.

Теперь, три рокы по смерти Олґы Прокоп, знамый русиньскый общественный діятель на Підкарпатю, Володимір Біланин, выдав вшыткы співанкы, котры позберала і упорядковала.

На презентації, котру вела внучка Наталія Симчик, выступали фолклорны ансамблі Бабчина співанокчка – дітьскый колектів, котрый основала Олґа Прокоп, і Чинадіївка, в котрім Прокоп сама выступала, як і Олена Никитюк, котра співала з Олґов Прокоп в дуеті Червена ружа.

Як далше інформовав Юрій Шиповіч, на презентації брали участь і Михаіл Зан, член Русиньского културолоґічного клубу, кандідат історічных наук, доцент Катедры політолоґії і державного управліня Ужгородьской націоналной універзіты, далше голова Закарпатьского областного научно-културолоґічного общества імени Александра Духновіча Юрій Продан і далшы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА