Oдтинковый документ о Варголи на плятформі Netflix

В сіти появил ся трейлер документального сериялю, котрый бесідувал буде про жытя і творчіст Енді Варголя. Продукция посвячена передовому представникови поп-арту явит ся на стрімінґовій плятформі Netflix уж 9. марця.

«Денник Енді Варголя» то нова документацийна пропозиция од стрімінґового ґіґанта. То адаптация посмертно опубликуваных денників артисты.

Што уж знатя про серияль?

«Денник Енді Варголя» (анґ. «The Andy Warhol Diaries») то продукция, в реализацию котрой заанґажуваный был Раян Мерфі, творця такых популярных продукций як «American Horror Story», «American Crime Story» ци «Glee». Новый проєкт є документальном адаптацийом приватных записків артисты, посмертні опубликуваных в формі денників.

Шістодтинковый серияль буде бесідувал про жытя і творчіст Варголя, а тіж про скандалі нюйоркской еліты зламу 60. і 70. років ХХ ст. Подля офіцийного опису Netflix’а, серияль зачынат ся, коли в 1968 році стріляют до Енді Варголя. Коли дотерат до него, што жытя колиси ся кінчыт, зачынат вести докладны запискы, в котрых контемплює сенс жытя, штукы і своіх емоций і свого почутя.

Што веце, істория Варголя буде оповіджена його, Енді, голосом, через схоснуваня технолоґіі AI (з анґ. artificial intelligence). Завдякы згоді Фундациі Енді Варголя в серияли буде мож почути слова вмерлого в 1987 році артисты. В «Деннику Енді Варголя» участ взяло вельох артистів, серед котрых нашли ся м.ін. Роб Лоу, Джон Вотерс, Боб Колячельо ци Джері Голь.