Одышол Петро Гойняк (1923-2015) – Вічна Йому Памят!

З жальом інформуєме, же 9. мая 2015 рока, вмер бл. п. Петро Гойняк. Похоронны богослужыня одбудут ся 13. мая т.р., o 12.00 год, в грекокатолицкiй церкви Успіня Пресвятой Богородиці в Ліґници.

Петро Гойняк народил ся в 1923 році, в селі Нова Весь недалеко Крениці. В 1947 році, як більшіст Лемків, был выгнаний з рідной землі і привезений на Нижній Шлеск. На чужыні, з інчыма гудаками, был єдным з основателів асамблю “Думка”. Враз з приятелями з капелі, грывал на лемківскых забавах і весілях. Од початку основаня Лемківского Ансамблю Пісні і Танця “Кычера”, был єдным з його філярів. Разом з другыма гудаками, медже інчыма з Михалом Олеснєвичом (1926-2012), творил кычеряцку капелю, завдякы котрій остало одтвореных вельо стародавных пісен і співанок та переданых наступному, молодому поколіню лемківскых гудаків. Такого смыка і співу, автентычного, лемківского, уж веце не буде. Одышол єден з остатніх автентычных, лемківскых гудаків.

Вічна Йому Памят!

За тым мотузком можете почути спомины покійного находячы ся в архіві радия лем.фм.

Долов, єдна з пісен, співана Петром Гойняком і Михалом Олеснєвичом.

https://www.youtube.com/watch?v=GJqxnGhUa_s

А ту, медже інчыма, про покійного:

https://www.youtube.com/watch?v=YuwKXdefnuQ