Оген не музыка – в Бартицях проходила VI Панноніка Фольк Фестіваль

В днях од 30. серпня/авґуста до 1. вересня/септембра 2018 р. проходила VI едиция Панноніка Фольк Фестіваль. До Бартиц, находячых ся над Попрадом, пришли любителі балканьской музыкы, якы мали і можніст жыти в побудуваным специяльно фестівальовым селі та прібувати локальных страв. Была то выняткова едиция подіі, яка притягнула рекордове чысло люди – рахує ся, же до Бартиц пришло аж і 50% більше люди як рік тому. Правдоподібно на фестівали бавило ся кус більше як 10 тис. любителів, не лем балканьской, музыкы.

Панноніка притягнула не лем богатым проґрамом концертів, але і барз добром локалізацийом. Попрадскій Ландшафтний Парк дал можніст одорвати ся од цивілізациі, быти офляйн. В перервах медже концертами мож было взяти участ в чысленных варштатах, нп. танця, сміху ци творіня вінців з піря, занятях йоґі або в авторскых стрічах. Вельо атракций зрыхтувано і для наймолодшых участників Паннонікы – родины з дітми были єдном з найчысленнійшых ґруп, што творили фестівальове село.

О проґрамі концертів оповідала Уршуля Новак, спілорґанізаторка фестівалю: Того рока аж вісем з дванадцетьох ансамблів запрезентувало ся в Польщы перший раз. Могли сме тіж слухати першого музычного проєкту, якого сме ініцияторами і якій был зрыхтуваний специяльно на наш фестіваль – бесідую про спілпрацу леґендарного Кроке з вызначном болгарском співачком, солистком хору Филипа Кутева – Нелі Андреєвом. Любителі корінной музыкы слухали такых ансамблів як Babra з Мадяр, што грат музыку полудньовых Славян на струновых інструментах, дутой оркєстры Fanfara Transylvania з Румуніі ци угорско-румуньского колективу Nadara GypsyBand. She’Koyokh, BGKO – Barcelona Gipsy balKan Orchestra, Tibble Transsibirska та Marko Marković Brass Band вказали ся пропозицийом для глядаючых фузиі традицицийной музыкы з інчыма формами. Сербском репрезентацийом брасбендів, яку особливо ся в нас любит, были Orkestar Danijela, Orkestar Bojana Kirstića і Šidski Trubači. Проґрам тогорічной Паннонікы вказал музыку Балкан і середньой Европы з вельох стран, під оглядом зріжницюваня музычных форм, інспіраций, якы дає, ци емоций, якы родит (…).

Зачали ся уж роботы над дальшом едицийом подіі. VII Панноніка Фольк Фестіваль одбуде ся в дн. 29.-31. серпня/авґуста 2019 р. Редакция ЛЕМ.фм плянує быти в Бартицях і о рік.

Знимкы зробил Якуб Зиґмунт.

Четвер, 30. серпня/авґуста 2018 р.

Пятниця, 31. серпня/авґуста 2018 р.

Субота, 1. вересня/септембра 2018 р.