Музей ім. Оскара Кольберґа в Присусі, Одділ Музею Радомского Села в Радомі, просят присылати внескы о признаня загальнопольской Нагороды ім. Оскара Кольберґа за заслугы для народной культуры. Кандидатуры мож зголошати до кінця марця т.р.
Нагорода ім. Оскара Кольберґа признавана єст од 1974 р. як узнаня цілости діяльности, або за конкретны осягніня о особливым значыню для народной культуры. Признаня нагороды мат на ціли выріжнити особы, ансамблі, інституциі культуры, або позаурядовы орґанізациі за выдатны осягніня та артистычну творчіст. Нагорода вказує і промує найліпшы успіхы в сучасній народній творчости, окрислят тіж єй напрямы і взірці.
Конкурс обнимат шіст катеґорий:
- народны творці ремесел і народной штукы: різба, малярство, тканя, вышываня, плетіня, вырабляня горців, артистычне ковальство, столярка і сницарство, вырабляня чачок, обрядовы прикрашыня, напр. писанкы, або вытинанкы, але тіж: музыкы, танцуристы, співакы і выконавці музычных інструментів;
- народна література, писменникы, народны поеты;
- народны капелі;
- фольклористычны ансамблі;
- соспільно-культурны діячы, популяризаторы народной творчости та дослідникы-реґіоналісты;
- інституциі і музеі, якы причынили ся до розвитку народной штукы і фольклору в Польщы.
Патроном нагороды єст Оскар Кольберґ – польскій етноґраф, фольклориста, композитор, творця найбільшой колекциі збірників (84 томы) про народну культуру і штуку XIX-вічной Польщы, названой по його смерти як Діла вшыткы, яка доднес єст основом для сучасных наук о культурі інспирацийом для науковой і артистычной творчости.
Серед дотеперішніх лавреатів находят ся м.ін. проф. Роман Райнфус, др Уршуля Яніцка-Кжывда, Етноґрафічний Музей ім. Северина Удзєлі в Кракові, Оркєстра св. Миколая – част іх діяльности было або єст звязане з досліджаньом Лемків, як тіж лемківска капеля Кычера з Ліґниці (1995 рік). А може серед самых Лемків найде ся дахто, кому винна быти признана тогорічна нагорода?
Реґулямін конкурцу найдете гев.
Коментарі