Памятник чехословацькым воякам ґенерала Свободы на поштовій марці

Місто Свідник має новы поштовы маркы, на котрых є Памятник 1-го Чехословацького армадного корпусу на Дуклі. Інформовало о тім місто на своїм офіціалнім вебсайті.

Як мож прочітати в поданій інформації, місто Свідник перед трьома роками пожадало веджіня Словацькой пошты і Міністерство транспорту Словацькой републікы о вытворіня реґіоналной поштовой маркы. Єднов із причін той жадости было, жебы дати можливость домашнім і турістам „загнати Свідник до світа,“ пише ся на сайті.

Нова поштова марка є повязана із 80-ов річніцьов Словацького народного повстаня і Карпато-дукляньсков операційов, котра значно овпливнила історію того реґіону. Обидві річніці припоминають ся у 2024-ім році.

„Памятник 1-го Чехословацького армадного корпусу, котрый находить ся на марці, є єдным із найвызначнішых памятных міць в нашім реґіоні, а єдночасно є і Народнов културнов памятков.“

„Тота поштова марка присвячена є памяти тых, котры бойовали за слободу і мір в тых важных історічных діях. На поштовы маркы дістануть ся лем цілообщественно найвызначнішы мотівы, особности і дії. Мы горды, же Карпато-дукляньска операція і Словацьке народне повстаня суть єдныма з них,“ пише ся на сайті міста.

Ціна єдной маркы є єдно евро, і мож їх купити в Турістічнім інформачнім центрі у Свіднику, зато може мати і зберательску вартость.

Памятник 1-го Чехословацького армадного корпусу ґенерала Людвіка Свободы, в котрім бойовали і Русины, находить ся в катастралній теріторії русиньского села Вышній Комарник. Быв збудованый у 1949-ім році.

Памятнику доміновала монумелнтална скулптура чехословацького вояка. Пізніше вояка одсторонили і зничіли, а на його місце дали скулптуру з назвов Жалію, в рамках котрой жена дяковала совітьскому воякови.При нагоді 70-ой річніці Карпато-дукляньской операції скулптура чехословацького вояка вернула на своє місце на Дуклі, нажаль, уж лем копія.

Памятник быв выголошеный за Народну културну памятку у 1961-ім році.