Парастас – В памят жертв акциі Вісла – неділя, 17.00 год.

28. квітня/апріля 1947 р. зачала ся акция Вісла. Выселенчо-асиміляцийна операция безповоротно знищыла лемківскій світ, довела до розорваня родинных та соспільных звязків, культуровых страт і знищыла материяльну спадковину народу. 72 річниця той траґічной подіі того рока сходит ся зо святом даючым надію і радіст – великым праздником Воскресіня Христового.

Просиме выслухати в Неділю Пасхы о 17.00 год. парастас, якій буде офіруваный вшыткым жертвам траґічной акциі Вісла і страдавшым в комуністичным лаґрі в Явожні.

Богослужыня одспіват Мужскій Камеральный Церковный Хор Клірос, діючый при Осередку Православной Культуры «Елпіс» в Ґорлицях, котрый сесу платню выдал з благословліня владыкы перемышльско-ґорлицкого Паісия в 70. річницю выгнаня.

Най тота молитва, емітувана в ден праздника праздників, буде присвячена роздумам і припомянутьом вшыткых жертв страдавшых в операциі 1947 р.

Вічная Памят! Христос Воскрес!