Патріарха Варфоломій І. брав участь на екуменічній конференції в Мадярьску. Стрітив ся і з митрополітом Філіпом

В днях 20-го аж 25-го септембра 2023-го року быв на навщіві Мадярьска константінопольскый екуменічный патріарха Варфоломій І. Патріарха прияв позваня Паннонгальской абатії, котра вже традічно орґанізовала меджінародну екуменічну конференцію, яка проходила 22-го септембра.

Варфоломій І. з нагоды історічно вызначной навщіві Мадярьска в стародавній Базиліці святого Мартіна в Панногалмі одслужыв Божеску літурґію в неділю 24-го септембра.

Окрім того почас конференції одбыло ся і екуменічне богослужіня, котре мало назву Глядай мір! Участным на екуменічній події быв і гайдудороґскый ґрекокатолицькый архієпіскоп і митрополіта Філіп Кочіш, з котрым ся патріарха стрітив.

„Присутность Константінопольского екуменічного патріархату в Мадярьску, посередництвом свого Православного екзархату, є проявом того, же тота мала, але стара і традіційов богата православна церьков має абсолутну любов і почливость до того прекрасного народа і країны,“ повів партріарха Варфоломій почас екуменічного богослужіня, на котрім брав участь і митрополіта Філіп.

„Абатія, в котрій находиме ся, є жывым свідком завзятости і віры мадярьского народа з їй довгов і славнов історійов. В їй стінах усвідомлюєме собі, же їй фундаменты были покладены іщі в часі, коли восточна і западна церьков была єднотнов наперек културным, общественным і языковым розділам,“ цітують мадярьскы медії патріарху.

„Правительство константінопольской матерьской церкви певно вірить, же Слово – заповідь безконечной любви і милости Отця – переможе тоту інштітуціоналну темноту, котра появила ся меджі різныма церьквами, якы, гладаючі земны нагороды, одышли од євангелія,“ говорив на конференції патріарха Варфоломій І.

В Мадярьску ся понад 51 процент населіня голосить ку римокатоликам, другы найчісленнішы суть кальвіны, ку котрым ся голосить 15,9 процента людей. Ґрекокатолици представлюють 2,6 процента населіня, і од 2015-го року мають митрополітну церьков з Гайдудороґсков архієпархійов і єпархіями в Мішколці а Ніредьгазі.

Православных є за офіціалныма даныма в Мадярьску 0,1 процента. Свій екзархат там має Константінпольскый екуменічный патріархат, Московскый патріархат в Мадярьску має Будапештяньско-Мадярьску єпархію.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА