ПечаКуча (Мультікультуровий) Краків

Фундация Маґазин Культуры враз другыма партнерами просит на 15. едицию з циклю ПечаКуча Краків, котра одбуде ся 13. жолтня/октобра 2016 р. о 18.00 год. в Кракові при ул. Юзефа 17. Головным гаслом, за котрым буде ішол задуманий плян той стрічы, єст «Мультікультуровіст».

Формула ПечаКуча Краків то предовшыткым бесіды з запрошеныма гістми, котрых оповісти приближат участникам елементы вельох культур в доцяп неакадеміцкым виді. Орґанізаторы запросили на тот ден особы, котры представлят проблемы, дотуляючы ся мультікультуровых родин, та євангелицкых, жыдівскых, шведскых, мароканьскых тем. Особливым прелеґентом буде Петро Козміньскій, студент росийской філолоґіі з русиньско-лемківскым языком, котрий оповіст о Русинах, але і о Рускій Бурсі в Ґорлицях, єй цілях і значыню так в істориі, як і в днешніх часах.

Фундация Маґазин Культуры діє од 2010 рока, промуючы шыроко поняту культуру і штуку, орґанізує выставы, фільмовы проєкциі, концерты, вернісажы і др. Спілпрацує з артистами, аніматорами культуры, творцями і інчыма орґанізациями і фундациями.