«Печатня» – Річник Руской Бурсы 2020 – середа, 18.10 год.

В днешнім проґрамі «Печатня», якій задумал і долгій час вюл Богдан Ґамбаль (1965-2020), побесідуєме про свіже выданя Річника Руской Бурсы 2020. Гварити будеме з його редакторком – др габ. Оленом Дуць-Файфер, што лем приближыт нам його зміст і выдавничый процес.

Од 2017 р. Річник Руской Бурсы єст моноґрафічном публикацийом, што значыт, же не односит ся він до точной річниці, лем oповідат про деякій період загальні – як все барз важный для лемківской істориі. Шістнадцете выданя посвячене єст темі «Лемківского/ русиньского меджевоєнного періоду» – часу найдале посуненой еманципациі.

Річник Руской Бурсы 2020 дедикуваный єст памяти Богдана Ґамбаля, што єст очывидне, кєд покійный был першым спілредактором выданя, а пак долгы рокы одповідал за редаґуваня части «Документы».

З інтервю дознаме ся про наголовкы поєдных статій, іх авторів і обшыри наукового заінтересуваня. Дакус підеме допереду – задумаме ся, чого бракує в професийным рыхтуваню лемківскых науковых часописів, што годно бы ся было поправити, де потрібный єст проґрес і системове розвязаня деякых проблемів. Вкінци редакторка спомяне і на тото, што «Річник Руской Бурсы» то перше того рода выданя, што перетерат стежкы для – майме надію – дальшых лемківскых науковых періодиків.

Премєрове высыланя буде в середу, 23. грудня/децембра 2020 р., о год. 18.10. Проґрам повториме наступного дня (четвер) о 4.00 год. рано і в найблизшу суботу о 11.00 год.