Перед 20-ма роками выголосили єпіскопа Ґойдіча за блаженого

Двадцять років тому, 4-го новембра 2001-го року, в Римі на Площі святого Петра были выголошены за блаженых двоми ґрекокатолицькы мученици за віру – пряшівскый єпарха Павел Петро Ґойдіч і єромонах Методій Домінік Тырчка.

Як інформовав говорця Пряшівской архієпархії Михал Павлишіновіч, почас септембровой навщівы Папы римского Франціска в Пряшові были мощі блаженых уложены в престолі, „чім іщі веце зміцнило ся значіня їх мученицькой смерти якраз про вірность Святішому Отцьови.“

Річніцю выголошіня за блаженых собі днесь припоминать Пряшівска архієпархія торжественнов архієрейсков літурґійов, котру одслужыть в Катедралнім соборі св. Йоана Крестителя архієпіскоп метрополіта Йоан Бабяк.

Першы намагы зачали в Америці

Як інформовав Павлишіновіч, першы намагы о беатіфікацію єпіскопа Ґойдіча зачали в Споєных штатах Америкы, кедьже в Чехословакії быв тоталітный режім, котрый боронив реліґійній слободі.

„Кавзу владыкы Ґойдіча ініціовала Піттсбурзька метрополія в Споєных штатах Америкы, котра у 1983-ім році адресовала до Рима пропозіцію на процес беатіфікації єпіскопів Павла Петра Ґойдіча, Теодора Ромжы і Василя Гопка. Конґреґація про кавзы святых выдала на жадость Піттсбурзькой метрополії Nihil obstat (ніт зеперечінь) на зачатя процесу їх беатіфікації,“ інформовав говорця архієпархії.

Поступно здобыты знаня і матеріалы в тій кавзі пізніше з Піттсбурґу передали втогдышній Пряшівскій єпархії, кедьже по 1989-ім році змінив ся режім і Ґрекокатолицька церьков знова могла наповно фунґовати і бывшых соціалістічных країнах.

По 110-ох роках од народжіня єпархіална фаза

В день 110-ой річніці народжіня єпіскопа Павла Петра Ґойдіча, 17-го юла 1998-го року, в каплічці єпіскопской резіденції в Пряшові офіціално одкрыла ся єпархіална фаза выголошіня за блаженого владыкы.

„Про роботы в тій кавзі быв призначеный постулатор, священик Ян Креглик, а так само были зряджены три комісії – юрідічна, історічна і теолоґічна. Комісія історічна концентровала ся і оцінила вшыткы матеріалы, котры ся сохранили о особі владыкы Павла. Комісія теолоґів їх бадала з теолоґічного погляду, ці в них не є штось проти віры. Комісія юрідічна выслухала вшыткых свідків і їх выповіді записала подля правил канонічного права.“

Завершіня вшыткых намагань

Завершіньом вшыткых тых намагань была торжественна беатіфікація в Римі 4-го новембра 2001-го року, коли Святішый Отець Йоан Павел ІІ. выголосив єпіскопа Павла Петра Ґойдіча за блаженого, а в єдно з ним і єромонаха Методія Домініка Тырчку.

На беатіфікацію до Рима пришло коло 5 тісяч віруючіх із Словакії. Офіціалный проґрам пути зачав вже 3-го го новембра, коли в Базиліці св. Клімента, де быв владыка Ґойдіч у 1927-ім році рукоположеный на єпіскопа, была одслужена літурґія.

По торжественній беатіфікації в тот самый день пополідне одслужена была літурґія в церьковнославяньскім языку в Базиліці святой Пракседы. На другый день была одслужена далша дяковна літурґія в Базиліці Санта Марія Маджоре, де были Папом Адріяном ІІ. у 868-ім році схвалены церьковнославяньскы літурґічны книгы.

Владыка Василь Гопко быв Йоаном Павлом ІІ. выголошеный за блаженого о нецілы два рокы пізніше, 14-го септембра 2003-го року в Братіславі. Єпіскопа Теодора Ромжу тот самый Вселеньскый Архієрей выголосив за блаженого 27-го юна 2001-го року у Львові.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА