Перед 30-ма роками служыли першу літурґію на горі Звір

11-го новембра 2020-го року минать точно тридцять років, одколи была одслужена перша літурґія на горі Звір в селі Літманова, Старолюбовняньского окресу.

Літурґію одслужыв втогдышній містный адміністратор ґрекокатолицькой парохії Ян Завацькый з Васильом Кормаником, якый быв у тім часі ректором богословской семінарії в Пряшові. О річніці першой літурґії інформовав Михал Павлишіновіч із Інформачного центра Пряшівской архієпархії.

Літурґія почас одпусту

Перша літурґія на горі Звір, де од 5-го авґуста 1990-го року до 6-го авґуста 1995-го року мали проходити зъявіня Пречістой Дівы, одбыла ся в рамках празднованя одпусту в Літмановій. Церьков є в селі присвячена святому Михаілови Архістратигови, котрый має день в літурґічнім календарі 8-го новембра.

„Была то неділя 11-го новембра 1990-го року і я быв запрошеный до свого родного села Літманова служыти святу літурґію і проповідати в рамках одпустового празднованя у парохіалнім храмі, котрый є присвяченый святому Михаілови Архістратигови. По сполочнім дополідняйшім празднованю в храмі сьме пополідне вєдно з отцьом Яном Завацькым і з дівчатами – Іветков а Катков (візіонарькы, позн. ред.), служыли першыраз літурґію на горі Звір в деревяній хыжі – майдані. Остатні люди стояли вонка,“ споминать на тоту подію Василь Корманик.

Поволіня служыти літурґію на горі Звір дав втогдышній пряшівскый єпарха, владыка Йоан Гірка.

Наймолодше путницьке місце Пряшівской архієпархії

Гора Звір є наймолодше путницьке місце Пряшівской ґрекокатолицькой архієпархії. Церьков доднесь бадать, ці зъявіня были досправдовы. Меджі роками 1990 аж 1995 ся мала двом молодым дівкам Іветі Корчаковій і Катарині Чеселковій появляти Пречіста Діва. Моментално є ціла документація зъявінь вєдно з посолствами загнана на посуджіня на Конґреґацію доктріны віры у Ватікані.

Літманівска Гора Звір є путницькым місцьом од 7-го септембра 2008-го року. Пряшівскый архієпіскоп і метрополіта Йоан Бабяк выголосив довтогдышнє місце молитвы на горі Звір за путницьке місце на основі факту, же од 1990-го року до Літмановой путує велике множество людей із Словакії, але і споза граніць, „і многы свідоцтва бісідують о тім, же путници в Літмановій находять страченый покій душы, черьпають Божу поміч і по тайні покаяня зачінають новый період жывота,“ пише ся в установлюючім декреті.

За головный праздник є становлена неділя по першій пятніці в місяці авґуст. Гора Звір має од 2010-го року духовне путо з папсков базиліков Santa Maria Maggiore в Римі, котра є першым і головным маріяньскым храмом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА