Передватряна «Бесіда» до придбаня

Стоваришыня Лемків печатало найновше чысло свого пресового орґану – «Бесіду», но. 4 (157), липец-серпен 2017. Ноне выданя так передньом, як і задньом окладинком просит на найблизшу ХХХVII Лемківску Ватру на Чужыні. Окрем того, подібні як попередні «Бесіды» з 2017 рока, часопис є по части посвячений 70. річници акциі Вісла. В ґазеті мож прочытати м.ін.:

• Piotr Trochanowski, To brzydko. To bardzo brzydko!;
• Миколай Коневаль, Обычаї великодніх свят по камюньскы (докінчыня з переденього номера);
• Демко Трохановскій, Інчий як вшыткы – дипломовий концерт Наталиі Бочнєвич;
• Петро Трохановскій, «Терочка» і Мурянка в Щеціні;
• Севериян Косовскый, «Обіцюю навчыти ся вашого языка…» – владыка Юрий на інґресі до Лемків;
• Петро Медвідь, В Осієку проходил Світовий Конґрес Русинів; 
• Петро Трохановскій, Свято Професора Генрика Фонтаньского;
• Анджей Жыґадло, Деревце;
• Петро Трохановскій, 4000 кільометрів в 7 дни (продолжыня);
• Петро Трохановскій, З выдавничой поличкы – рецензиі: Церкви і іконы Лемковины, Я. Ґємза; Лемковина по обох сторонах Карпат, С. Крыціньскій; Хырбетом ку горам, П.Р. Маґочій; Карпатска Русь – Історичний Атляс, П.Р. Маґочій; Світ за текстом, Любоха-Круґлік і Малиса; Польско-Рускій Бескід Низкій, А. Потоцкій. 

Окрем поміненых статий в новым номері найдете дальшы передрукы з інчых ґазет, односячы ся до лемківскых тем. На єдній зо сторін публикуване є писмо од Стоваришыня Лемків до Інституту Нацийональной Памяти в справі дискримінуючых таблиц «Об’єднаня Лемків».

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвячений єст збережыню істориі, культуры і языка Лемків, інформуючий о жытю нашой і братніх нам соспільности, плекаючий вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 08.00-16.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.