Перегляд русиньскых подій в найблизший вікенд

Хоц літо помалы іде ґу кінцьови, в найблизший вікенд найдете вельо подій, котры більше ци меньше звязаны сут з русиньском культуром. Представляме найважнійшы з них.

Пятниця, 17.08.2018

В Зъєднаных Штатах Америкы, в пенсильваньскым місті Скрентон, мож выбрати ся уж днес на Славяньскій Фестіваль. То подія, котра буде тырвала до неділі при тамтышній грекокатолицкій парохіі. Найдете там домашнє ідло, звиджаня церкви, лотерию і другы атракциі.

Субота, 18.08.2018

Фундация «МЕМО», яка реалізує діяня в рамках проєкту Архів Новиця-Прислоп, просит в найблизший вікенд до лемківского села Новиця, де одбуде ся подія названа «Під єдным дахом». В суботу в будинку тамтышньой Сарепты буде мож видіти народну оперу, а по ній потанцувати на фольковій забаві, на котрій заграт Капеля Бродів враз з другыма запрошеныма гістми. В неділю, окрем музычной части, орґанізаторы пропонуют: показы фільмів, якы навязуют до Новиці і єй жытелів, котры континуували традицию робліня лжыц, показы сляйдів в тій тематиці з 80. років минулого столітя, і презентацию свого фляґового проєкту –  Архів Новиця-Прислоп.

Хоц уж днес вечером (пятниця) розпаліньом ватры в Коросні зачынат ся «Кутик галицкых ріжности», лемківскій елемент найдеме в суботу, коли в Коросні в рамках той подіі заграт лемківскій фольковий ансамбль Бурян з Ґорлиц.

Село Раковчік і Піддукляньскій Освітовий Осредок во Свиднику просит на суботу 18. серпня/авґуста на Фестіваль Народных Капель, котрий зачне ся о 15.00 год. в ареалі сельского уряду в Раковчіку. Выступит там выдатна русиньска співачка, а при нагоді і редакторка нашого братнього радия Русин.фм, Мариянна Железна, з капельом цимбалистів.

Підеме іщы за велику воду. Наступна подія уж заран в пенсильваньскым місточку Тейлор в ЗША, на котру просит східній одділ Карпаторусиньского Общества в Пенсильваніі на челі зо своім предсідательом Майком Шымко і Американьска Карпаторусиньска Молодіжна Орґанізация св. Юрия. Буде то проґрам о деревяных русиньскых церквах Карпат. Прелекцию выголосит доктор Мішель Парвеньска, котра представит на фотоґрафіях своі прогулькы, одкрытя і спостережыня в обшыри красы деревяных церкви Русинів.

Неділя, 19.08.2018

Выгорлятскій музей в Гуменным орґанізує в суботу подію в рамках проєкту Родакы в скансені під назвом Руска Волова і Кленова в скансені. На подію, котра зачне ся о 14.00 год, музей просит не лем родаків тых двох сел, но і вшыткых любителів істориі, фольклору і традицийных народных ремесел. Більше о подіі – за мотузком.