Голосник

Перегляд меншыновых фільмів

Од вчера, 4. лютого/фебруара 2020 рока, такой через цілый місяц проходит в Кракові перегляд документальных фільмів і репортажів під назвом «Такы люде як мы».

Фільмы походят з архіву проґраму TVP «Етнічны климаты» – циклю образів, котры направлены были на популяризацию поєдных нацийональных і етнічных меншын прожываючых в Польщы. Вказаны будут і фільмы з сериі проґрамів «В себе», а тіж фестівалю «В себе – At home».

«Такы люде як мы»

Наголовок перегляду высловлює основный замір орґанізаторів. Головным являт ся Фундация Judaica – Центр Жыдівской Культуры при спілпрацы Стоваришыня В себе – Аt home і ТVP Краків.

Перегляд єст місячном вандрівком по ріжных нацийональных і етнічных меншынах. Вшыткы з фільмів были перше емітуваны в польскій телевізиі в рамках спомянутых двох проґрамів і фестівалю. Вчерашньом інавґурацийном подійом пн. «Такы люде як мы» зачала ся презентация образів. В одкрытю брали участ думкодавці фестівалю і авторы фільмів Вальдемар Янда, Кжыштоф Кжыжановскій і Браян Скот.

Подібні як цілый цикль проґрамів «Етнічны климаты» і «В себе», перегляд єст заплянуваный на каждый ден, так жебы одпрезентувати кажду з меншын. В четвер, 6. лютого/фебруара, буде вечер присвяченый лемківскій етнічній меншыні. То як раз про Лемків выемітуваны будут три фільмы, котры явили ся перед роками в ТVP. Будут то проґрам веденый Браяном Скотом «Лемківска ватра на чужыні» про михалівску ватру з 2004 р., фільм «Рідна бесіда» і «Імост і єґомость». Всітри сут доступны в сервісі YouTube.

В дальшых днях перегляду будут промітаны образы з жытя інчых меншын, котры прожывают в Польщы, будут то фільмы м.ін. про Жыдів, Украінців, Ромів ци Курдів. Єден з проґрамів про жыдівску меншыну під наголовком «Витай Самуель дома» має і лемківску асоцияцию. Акция діє ся в лемківскій Зындрановій, а сцены были зниманы тіж в тамтышнім Музею Лемківской Культуры. Жыд Самуель по роках вертат до рідного села – Зындрановой, де сусідувал з Лемками.

«Етнічны климаты» і «В себе»

Оба приведены проґрамы на все записали ся в істориі краківской телевізиі. «Етнічны климаты» то маґазин, якій емітуваный был што місяц од марця 2002 рока. Головном його темом была презентация жытя нацийональных і етнічных меншын, котры заселяют Польщу. Были проґрамы про автохтонны меншыны, як і тоты, котры зачали приходити до краю. Проґрамы вюл знаный в меншыновым світі Браян Скот. Маґазин, з перервами, вказувал ся до 2013 рока.

Подібный темом проґрам то «В себе». Был так само емітуваный на краківскій державній телевізиі. Была то серия, котру рыхтувал Кжыштоф Кжыжановскій, польксій репортер, монтажыста, фільмовый оператор, думкодавця вельох документальных фільмів, а тіж спілреалізатор спомненой сериі «Етнічны климаты».

Оба циклі зас вертают на місяц. В рамках перегляду видіти буде мож наново культовы фільмы. Коли перед роками были іх премєры, перед телевізорами засідали цілы родины, а кажда презентация фільму з лемківском темом была пак шыроко коментувана серед самой меншыны.

Полну розписку перегляду чытайте за мотузком.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі