Перемога Павла Біщака на суботній ґали в Вроцлаві. Ґратулюєме!

В суботу інформували сме, же лемківскій файтер Павел Біщак стане до бою з турецкым заводником Мегметом Алі Баліком (Турция) в вроцлавскій гали «Орбіта», в рамках ґалі FEN 9 Go For It. На жаль, противник П. Біщака, ідучы до Вроцлавя, мал автомобільну краксу, по котрій дознал контузиі, а його шофер, в результаті краксы, нашол ся в шпытали.

Орґанізаторам суботьной ґалі в остатній хвили повело ся найти партнера, зато на рінґ вышол Павел Обозний, 32-літній білорускій файтер, котрий в своій карєрі выграл 51 з 59 боів. Зміна противника не влинула на кондицию Павла Біщака – выграл в 2. рунді через нокаут в бою за принципами К-1 в катеґориі до 77 кґ.

Ґратулюєме і желаме дальшых успіхів!