Переможцьом літературного конкурзу Харитун

В пятніцю 14-го децембра 2018-го року в Пряшові обыло ся выголошіня переможців Літературного конкурзу Марії Мальцовской і презентація оціненых творів.

Конкурз вже 5-ый раз выголосив Сполок русиньскых писателів Словеньска в співпраці із Академійов русиньской културы в Словацькій републіці і Інтітутом русиньского языка і културы Пряшівской універзіты в Пряшові, в котрого просторах святочна подія проходила.

Приголошеных вісем писателів

До літературного конкурзу шторік можуть приголосити ся авторы, котры пишуть по русиньскы і котры суть гражданами Словацькой републікы. Загнати мож лем творы, котры дотеперь не были іщі публікованы.

Тот рік до конкурзу приголосило ся вісем авторів. Фахова журі, котра была в складі Михал Павліч – председа журі, Кветослава Копорова і Михала Голубкова, оціньовала як поетічны, так і прозовы творы. Наконець журі выголосила першы три місця.

Переможцьом є Харитун

„Третє місце здобыв Йосиф Кудзей за свої байкы з капков сполоченьской крітікы. Порота оцінила їх гумор і рітмічне обробліня,“ повів про радіо русин ФМ председа журі Михал Павліч.

На другім місці в 5-ім річнику Літературного конкурзу Марії Мальцовской скінчіла Людмила Шандалова, авторка поезії, прозы і театралных сценарів про дітей. Тот рік залучіла ся до конкурзу лірічныма творами.

На першім місці скінчів і цілковым переможцьом конкурзу став Юрко Харитун, русиньскый поет, котрый є майстром свого ремесла на професіоналній уровни. „Порота оцінила многозначность і обробліня стихів, котры мож заділити до рефлексівной і духовной лірікы,“ інформовав Павліч.

Найліпшы творы будуть публікованы в часописі Русин, котрый має у каждім выданю свій літературный додаток під Поздравліня Русинів.