Перший ден Театральных Стріч Інновіца 2015

Од днес, 4. червця, в Новици на Лемковині зачынат ся фестіваль Театральны Стрічы Інновіца 2015.

То уж осма едиция подіі, яка оферує любителям альтернатывных театральных вражынь три дни стріч з артистами і театрами зо світа, якы свою творчіст вказуют в нештоденных обставинах, бо дармо глядати в маленькій Новици театральных дощок, або амфітеатрів. Пєсы і концерты найчастійше презентуваны сут в пленері, в дашвній школі в Новици, або в дакотрій зо старых лемківскых хыж.

Перший фестівальовий ден зачне ся о 20.30 год. в грекокатолицкым осередку Сарепта, де вказана буде пєса Віст театральной лябораториі Студийо АКТ з Украіны, діючой при Центрі Леся Курбаса з Кыйова – Нацийональным Центрі Театрального Мистецтва. Студийо АКТ то ляборатория, яка досліджат характер діяня і координує роботу акторів през процес імпровізациі. Ляборатория направлена єст на акторів, але і на особы, якы заінтересуваны сут розвитком свойой креатывности. Згідні з філософійом лабораториі, робота актора мат отворену і заперту форму. Отворена форма – імпровізация – мат на ціли сотворіня творчого простору і повязана єст з творчом стороном акторской гры, а заперта форма – то поглубляня акторского варштату.

Можеме мати певніст, же з обома тыма формами сконфронтуєме ся вчас вечерньой пєсы. По ній заплянувано концерт ансамблю Осйан, якій запре перший ден Театральных Стріч Інновіца 2015.

Ґрупа Осйан то польскій музычний проєкт, якій грат музыку з погранича імпровізуваной музыкы, фольку і музыкы світа, головні інструментальну музыку. Оснований был в 1971 році з ініциятывы Яцка Осташевского, Марка Яцковского (пізнійшого основателя ґрупы Манаам) і Томаша Голуя. Ґрупа реґулярні выступувала в леґендарній краківскій Пивници під Баранами. З ансамбльом през якісий час спіплрацувал світовой славы джазовий музык – Томаш Станько.

Концерт ґрупы Осйан в Новици, днес о 22.30 год. (пленерова музычна сцена при хыжы Новиця 9).

фот. tupacz.com