Першов премєров ТАД в тій сезоні буде 12 стілців

Інсценація драматізації все актуалного роману 12 стілців од Ілію Ільфа і Євґенія Петрова буде першов премєров драматічного колектіву Театру Александра Духновіча (ТАД) в Пряшові в сезоні 2021/2022.

Як за театер інформовав Йозеф Юрчішін, премєра одбуде ся в суботу 23-го октобра 2021-го року (премєра была перенесена з 22-го октобра, позн. ред.). Драматізацію роману про театер зробила Терезія Міндошова, режійно приготовив пєсу Антон Коренчі.

Споєны дві лінії

Антон Коренчі, котрый є того часу директором драматічного колектіву Державного театру в Кошыцях, дебутовав на сцені ТАД пєсов Познатый непознатый. Подля режісера є в творчости театру чути дві лінії – часть представлінь є фестівалова, часть про публіку.

„Думам, же амбіційов авторкы драматізації, але і мойов, было споїти в пєсі 12 стілців обидві лінії,“ повів Коренчі, котрый думать, же тот култовый роман дає таку можливость. „Є збудованый на міцній темі і є вынятково гуморный, но гумор не є першоплановый,“ конштатовав.

На сцені цілый драматічный колектів

Коренчі назначів, же од зачатку хотів з далшыма членами реалізачного тіму Остапа Бендера і Іпполіта Воробянинова обсадити Євґенійом Либезнюком і Васильом Русиняком. Наконець є роль Бендера алтернована молодым актором Володиміром Рогачом.

Директор театру Маріян Марко є радый, же дали принагоду молодому акторови. „Володя добрі запав до колектіву, хоче ся учіти. Про нас важне, же бісідує по русиньскы і має талент. Навеце іде о молодого мужа, котрых аж так много в драматічнім колектіві не є, і є охотный робити в такых фінанчных условіях, якы в ТАД маєме,“ повів о Рогачови умелецькый шеф Любомір Міндош.

На сцені вкажуть ся властно вшыткы членове драматічного колектіву. Автором сцены і костімів є Ярослав Даубрава, музику компоновав Владимір Шарішскый, хореоґрафію робив Андрій Суханов.

Театер оціненый

Марко інформовав, же в тій сезоні будуть мати штири премєры, причім в тім календарнім році іщі єдну. Признав же обмеджіня запричінены пандемійов суть проблемов, но є радый, же по одкрытю театру публіка знова вернула ся до театру, і єднако так є то і на селах северовыходной Словакії, де театер часто ходить выступати меджі Русинів.

Лем недавно ся русиньскый професіоналный театер презентовав на фестівалі Нова драма в Словацькім народнім театрі в Братіславі, де одограв пєсу Пісковиско. Із столиці Словакії собі ТАД приніс шпеціалну премію – Окрема ціна журі, за інвенчне спрацованя тексту і вытворіня очаруючой атмосферы орґанічно комунікуючой з публіков.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА