Першы такы Стрічы. Два дни і два місточка Нижнього Шлеска

Найблизшый вікенд принесе нам вельо музичных емоций. Кружок Стоваришыня Лемків в Пшемкові як раз в днях 5.-6. листопада/новембра зреализує ювілейны ХV Стрічы Трьох Поколінь з Лемківском Культуром.

Будут то першы такы Стрічы, што потрырвают два дни, а самы концерты пройдут в двох місточках Нижнього Шлеска. Як інформували нас орґанізаторы, тогорічна подія буде проходила на фоні 75. річниці траґічной Акциі «Вісла».

Пшемків і Шпротава

Думка зорґанізувати дводньовы Стрічы Трьох Поколінь з Лемківском Культуром явила ся голоснійше такой влони, коли то Євген Габура, ведучый місцевого Кружка і заступця ведучого Головного Заряду Стоваришыня Лемків, зо сцены апелювал до присутных товды представників державных і локальных власти о фінансове спертя.

Як видно – плян ся реализує. Будуче пшемківскых стріч явит ся кольорово. Уж в найблизшу суботу о 16.00 год. в традицийым місци – Пшемківскым Осередку Культуры, одбуде ся перша концертова част тогорічной ювілейной імпрезы.

Другій концертовый ден, першый раз в рамках той подіі, одбуде ся в недалекым до Пшемкова місточку – Шпротаві. В обох місцевостях (а радше околичных до них селах) в 1947 р. оселили ся Лемкы выгнаны з Карпат. То днес міцны осередкы лемківства, смотрячы хоц бы на чысло жытелів декляруючых лемківску нацийональніст. В обох місцевостях находят ся нашы парохіі.

Несподіванкы

Контактували сме ся з Євгеном Габуром, але не хотіл здрадити нам детального проґраму тогорічной подіі. Што зрозуміле – бо як сам підчеркнул, од років традицийом пшемківской імпрезы є, што орґанізаторы николи не подавали перше імен і назв запрошеных выконавців. Од себе, як редакция і медияльный партнер, можеме додати, што вартат быти і видіти/чути зрыхтуваны несподіванкы. Певне є єдно – будут ґаздове подіі – ансамблі Ластівочка і Ластівчата.

Зато же ювілейны Стрічы пройдут на фоні 75. річниці Акциі «Вісла», ансамблі, якы выступлят, своім проґрамом будут споминати на тоту траґічну подію і початкы лемківского жытя на чужыні. Як все, в сіньох пшемківского осередка (і на другій ден в Шпротаві) буде запрезентувана річницьова выстава.