Підкарпатскє попращало ся з Варгольом

«Тішыме ся, што могли сме спричынити, же Енді Варголь притягнул до нашого музею тисячы гостів та же было то можливе завдякы спілпрацы з нашыма приятелями з Пряшівского Самосправного Краю» – повіл маршалок Владислав Ортиль, вчас фінісажу выставы Енді Варголя в Округовым Музею в Ряшові.

«Дякуєме, же помагате нам промувати наш реґіон, же можеме так добрі спілпрацувати, презентуючы на Підкарпатю тото, чым ся гордиме» – бесідувал в Ряшові председа Пряшівского Самосправного Краю Мілян Маєрскій.

Пращаня робіт культового творці проходило подля богатого проґраму. Было специяльне опроваджаня по експозициі робіт Варголя, выклад о силі влияня поп-арту та концерт під одкрытым небом ґрупы Толгаі. Фінісаж притягнул толпы люди.

З каждой страны поплынули подякуваня

З той нагоды до підкарпатского приіхала делеґация з партнерскгоо реґіону, значыт з Пряшівского Самосправного Краю. Был спомненый председа ПСК Мілян Маєрскій та його спілпрацівникы. Была і Злата Сіпосова, ґенеральна консуль Словацкой Республикы в Кракові і Мартін Цубяк, директор Музею Енді Варголя в Меджелабірцях.

Выстава «Енді Варголь – перед і по» попращала ся з Ряшовом по понад двох місяцях, коли гостила в Округовым Музею в Ряшові. В дальшу дорогу рушат 17. червця/юнія. На конец візиты Варголя в підкарпатскым Округовым Музею зорґанізували культурну подію, котра была нагодом быти зо штуком/ близко штукы, але і нагодом бесідувати о місци штукы в простори реґіону та силі, яка плыне з медженародной спілпрацы реґіонів.

Присутніст выставы «Енді Варголь – перед і по» в Ряшові то ефект спілдіяня Підкарпатского Воєвідства з Пряшівскым Самосправным Крайом. Партнеры зо Словациі запропонували, в порозумліню з Музейом Енді Варголя в Меджелабірцях, жебы роботы і артефакты світовой славы артисты запрезентувати на Підкарпатю. Округовый Музей в Ряшові, інституцию культуру підкарпатского воєвідства, одвиділи тисячы гостів.

Фінісаж был особливым пращаньом з выставом, звінчыньом веце як двох місяців присутности Варголя в Польщы.

«Подія, через котру сме ся днес зышли, має подвійный вымір. З єдной страны то особливый смуток, же тырваючый пару тыжнів карнавал світовой штукы і поп-арту в столици підкарпатского воєвідства кінчыт ся. Была то знаменита гостина для вшыткых, што рішыли видіти выставу Енді Варголь – перед і по. Унікальна, специяльна оферта принесла імпонуючу фреквенцию веце як 7000 осіб! Тішу ся, же выстава вказала ся успіхом – чого доказом є хоц-бы спомнена фреквенция, а єй запертя стало імпульсом до выкреуваня черговой, барз інтересуючой подіі» – бесідувал вчас фінісажу маршалок Владислав Ортиль. «Культура то знаменита простір до затисняня партнерскых реляций, чого приміром сут нашы з Пряшівскым Крайом. Культура є необхідна при будуваню і тырваню в часі вшелеякых реляций. (…) Тішыме ся, же підкарпатскє стало ся місцьом, одкале творы мастера поп-арту могли еманувати і дотерати до дальшых люди» – підкрислял маршалок.

Председа ПСК Мілян Маєрскій в своім выступліню бесідувал о барз добрых реляциях медже реґіонами і спілдіяню в вельох обшырях і сферах жытя реґіонів.

«Трафлят ся, же хтоси властиві не знат, де єст Словация і чым єст. Але коли повіме Енді Вароль, і же выводит ся з нашых земель, то уж вшыткы асоциюют Словацию» – бесідувал Мілян Маєрскій, председа ПСК. «Дякуєме, же підперате нас в нашых діянях і же можеме ся дополняти. Днес є фінісаж выставы, але то не мусит быти нич смутне, радше початок чогоси чергового, ліпшого. Дякую зато, же помагате нам вказувати дальшым поколіням, кым был Енді Варголь. Наша спілпраца з Підкарпатьом не кінчыт ся, дякую за каждый єй прояв. Тот фінісаж то дух надіі, же наше спілдіяня буде дале ся барз добрі розвивало» – підкрислял Маєрскій.

Председа припомнул, што в Меджелабірцях, де наштоден презентуваны сут роботы Енді Варголя тырват велика інвестиция – розбудова музею, трансформация простори довкола, але і створіня нового, сучасного способу презентациі спадковины артисты.

Дальша траса Енді Варголя по Польщы

Выстава посвячена творчости і жытю Варголя, з увагы на речену комплексову модернізацию Музею, вандрує по Европі. Дотепер была в Дубровнику, по Ряшові переіхат до Кракова, Вроцлавя, пак до Ніццы.

Вчас фінісажу Мартін Цубяк, директор Музею Енді Варголя в Меджелабірцях запрезентувал публикацию посвячену выставі.

«Тішыме ся, же з нашом выставом можеме быти частю культурной укладанкы вашого реґіону» – бесідувал Цубяк. Підкрислил, што двоязычна публикация – по польскы і по словацкы, быде слідом по презентациі робіт Варголя в Ряшові. Запросил тіж вшыткых о рік – на одкрытя цілковито зревітализуваного музею.

Вчас фінісажу його гості могли почути доповід Михала Рута о влияню поп-арту на днешній дізайн «Купувати то барже американьскє як думати» та взяли участ в специяльным опроваджаню по выставі з Доротом Руском-Мармай і Михалом Рутом. Пак вызвучал концерт ґрупы Толгаі, якы запрезентували творы з платні «Мама Варголя».

«Тішыме ся, што музей міг гостити так інтересуючу і електризуючу публику выставу і же так, імпонуючо, пращаме Енді Варголя. Просиме на нашы дальшы подіі, двері нашого музею сут шыроко одкрыты» – підсумувал Боґдан Качмар, директор Округового Музею в Ряшові.

Фот. www.podkarpackie.pl