Голосник

Платня Штефана Штеця

До той поры любителі Штефана Штеця годны были слухати його співанок лем на концертах, а такой з приватных награнь публикуваных хоц бы в Інтернеті. Одтепер може быти інакше. Співак выдал свою дебютантску платню, котра як наголовок, має наголовок лемківской пісні. То замірена ціль, о чым шырше в статі долов.

«Полетів бы-м на край світа» то єдна з популярнійшых лемківскых, еміґрантскых пісен. Штець як раз тоту пісню выбрал на названя свойой першой платні, котра зберігат в собі выконуваны ним співанкы. На кружку нашли ся два ріжны выконаня той еміґрантской пісні. Перше в аранжациі самого Штефана Штеця, а другє было награне при акомпаніяменті Любици Чековской, композиторкы, з котром автор выступувал м.ін. в словацкым шов Земля Співат (Zem spieva). 

Уж влони, коли мали сме нагоду побесідувати зо Ш. Штецьом, споминал він на тото, што має коріня з Лемковины. Його дідо походил з єдного з лемківскых сел, а пристал до Габуры. З пісньом «Полетів бы-м на край світа» співак выступил в фіналі шов Земля співат, де при нагоді розповіл про колишні, як і теперішні проблемы, з котрыма борют ся молоды Русины, якы часто примушены сут до еміґрациі за роботом.

Гей, правда, назва платні выходит з лемківской пісні. Мене дуже захопила тота пісня. Єй текст, мельодия, а головні тото, же є актуальна і про теперішній час. Оно даколи мат чоловік такє почутя, жебы найліпше было мати крыла а деси летіти, повіл тым разом Ш. Штець нашій редакциі.

На платні нашли ся русиньскы, шаріскы, словацкы, ай украіньскы творы. Вслухати ся мож в тыповы балады, або підкарпатскы коломыйкы, котры жыво звучали такой серед Русинів Пряшівщыны ци Лемковины. Цедечко дає можніст познати світ традицийной народной музыкы, котра в цілым карпатскым реґіоні оджыват як раз вдяка такым проєктам. В награнях окрем співу і музыкы, мож почути деякы звукы з клепанок і дупканя, з котрого знаний є співак. Часто вчас своіх выступлінь Штефан презентує і своі танечны таланты, так жебы фольклор в його выконаню был як найбільше автентычний.

Пісню «Полетіл бы-м на край світа» єм чул перше 15 років тому в Празі, де єм через літо як студент працувал. Там проходили Дни Лемківской Культуры. На єдній з акций співала Юлия Дошна тоту саму співанку. З того часу єм ю тримал в голові. Краса. На фіналі єм знал, же мушу тоту співанку запропонувати, розповідал про нашу редакцию Штець внет по завершыню фіналового одтинка Земля співат. По успішніх выступлінях в шов, остал менуваний на Словациі як «русиньскій Карел Ґотт».

Штець окрем співаня робит в русиньскій редакциі Народово-етнічного высыланя Радия Патрія в Кошыцях, котре єст публичным радийом на Словациі. В державній телевізиі модерує і маґазин о жывоті в словацкых реґіонах під назвом Ahoj Slovensko.

Концерт промуювий нову платню пройде в пятницю, 4. мая т.р. в Кошыцях, при участи музычной композиторкы Любици Чековской та гудаків з фольклорного ансамблю Горнад.

За тым мотузком годны сте послухати архівального інтервю зо Ш. Штецьом.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі