Пленер на Лемковині

Од понеділька 25. липця/юлия тырват пленер п.н. «На Лемковині». Проходит він, розуміє ся, на Лемковині, в селі Зындранова при Музею Лемківской Культуры. Малярскы пленеры в міні-скансені орґанізуваны сут што два рокы. Орґанізатор просит на них творців з Польщы, Словациі і Украіны, переважні Лемків, але не лем. В тогорічным пленері бере участ пят осіб, а то Штефан Мальчевскій зо сусіднього села Тылява, Кінґа Зьобро-Дзяло і Мария-Віктория Мостек з Ряшова, як тіж участникы з Украіны – Мария Янко зо Львова і Анна Кырпан з Івано-Франківска. Штефан Мальчевскій різбит, а інчы малюют. Хоснуют ріжны малярскы технікы – акварелю, акриль і олій. В неділю, 31. липця/юлия, по завершыню пленеру буде мож видіти його результаты.

Тота подія являт ся одміном од інчых принятых форм діянь на хосен Лемків в Польщы. Малоприлюдна, але пленер єст нагодом до возникніня новых творів культуры, а не лем копіюваньом старых взірців.

На Лемковині легко приходит творити. Краса лемківской природы єст знана, краса традицийной, переважні сакральной архітектуры тіж повселюдно цінена, климат літній. Орґанізатор забезпечыл мешканя в Лемків, де мож істи традицийны стравы, а вечерами співати при місяци лемківскы співанкы. В Зындрановій приятливе середовиско. Остає лем творити. Зато артисты заохочают орґанізувати слідуючы пленеры. Такы акциі проходят і на Пряшівскій Руси, все будучы проявом любови до рідной землі, стимулюваньом розвитку лемківского артизму.