Завдякы увольнованю рештрікцій в повязаню з коронавірусом можуть свою роботу обновити і русиньскы професіоналны умелецькы тілеса – Театер Александра Духновіча і Піддукляньскый умелецькый людовый субор. Зряджовательом обидвох тілес є Пряшівскый самосправный край.
Піддукляньскый умелецькый людовый субор планує перед публіков выступити іщі в тій сезоні. Театер Александра Духновіча ся буде приготовльовати на премєру новой пєсы, котру заграть аж в новій сезоні.
Повный ход русиньского театру, єднако як і Театру Йонаша Заборьского в Пряшові, котрый є так само під Пряшівскым самосправным крайом, зачне 3-го авґуста 2020-го року. Значіть, театралны вакації будуть тот рік коротшы, і театры будуть приготовльовати новы інсценації, котры публіка буде годна видіти правдоподобно зачатком септембра.
Інформовала о тім Леа Геілова з Одділіня комунікації і пропаґації Канцеларії председы Пряшівсого самосправного краю.
Продовжує ся в Детекторі лжи
Театер Александра Духновіча в Пряшові продовжує в рихтованю наштудованя пєсы під назвов Детектор лжи в режії Светозара Спрушаньского. З онлайн простору ся пробы перенесуть до просторів театру, при дотримованю строгых гіґєнічных наряджінь. Планована перемєра, котра мала одбыти ся 3-го апріля, натеперь перенесла ся на половину септембра.
„В місяцях май і юн театер векшынов занимать ся заяздовыма представлінями (на селах, позн. ред.), в рамках котрых ся в сучасній добі в повній мірі не дають забезпечіти гіґєнічны рештрікції і наряджіня. Зато в юні і юлі будуть робітници театру черьпати доволенкы, припадно резервны вольна,“ конштатує директор театру Маріян Марко.
ПУЛС приготовить новый албум і юбілейный проґрам
Од першого юна до робочого процесу припоять ся ку технічно-господарьскым робітникам і умелецькы робітници вшыткых трьох частей Піддукляньского умелецького людового субору – балету, хору і орхестру. Робота так само буде выконована при дотримованю актуалных гіґєнічных наряджінь.
В першій половині юна планує ансамбель з хором і орхестром записованя нового компактного діску. В другій половині місяця, іщі перед закінчіньом сезоны, хоче ПУЛС одограти дакілько представлінь. Зачаток новой сезоны натеперь планує на першого авґуста.
„В авґусті нас чекать реалізація представлінь, в рамках можностей і на фестівалах,“ говорить директор ансамблю Юрай Швантнер, котрый спомянув і то, же ПУЛС буде окрім іншого в осени приготовльовати і і юбілейный концерт ку 65-ій річніці выникнутя того умелецького тілеса. Премєру бы хотіли одограти в першій половині децембра.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі