По майже році одкрыли зреконштруовану вежу на Дуклі

По майже річній реконштрукції в понедільок 26-го юна 2023-го року одкрыли выглядкову вежу на Дуклі. Інформовала о тім аґентура TASR.

Окремы роботы, котры были частьов другой етапы, были заміряны на комплексну обнову і модернізацію їй выглядковых купол, вєдно з выглядковов терасов, котра находить ся на стрісі спідньой куполы.

Познакомити і молодых з історійов

„Мож повісти, же днесь одкрываме выглядкову вежу на 90 процент докінчену і што до єкспозічной части про навщівників. Вежу, котра собі заслужыть вызерати як у 21-ім столітю, і думам, же нелем выгляд, але головно едукатівный розмір, інформаційно-комунікачны технолоґії і далшы річі, котры сьме ту выбудовали, суть на то, жебы молоды люди познакомили ся з войнами. З тым, што ту одбывало ся в двох світовых войнах,“ повів директор Воєньского історічного інштітуту Мілослав Чапловіч, котрый вірить, же вежу будуть навщівльовати нелем домашні, але і загранічны навщівници.

„Я барз радый і тішу ся з того, як шумні вызерать. То модерный културный центер, досправды модерна вежа, де люди можуть прийти за приємным зажытком, дізнати ся дашто о історії, а дакус і повзбудити, або освіжыти собі то, што ся учать в школі, може лем з книжок,“ доповнив міністер обороны Словацькой републікы Мартін Скленар.

Зробила ся друга з трьох етап, рахують з експозіційов

„Проєкт быв барз файні приготовленый паном директором і мене пересвідчів. Такой, кедь сьме ся односно того стрітили першый раз, знав єм, же то будуть добрі інвестованы грошы,“ повів на марґо реконштрукції бывшый міністер обороны Ярослав Надь, за котрого міністрованя ся реконштрукція зачала реалізовати.

Головным цільом обновы вежі, котру зачали влони в юлі, было вырішіня злого технічного стану обидвох купол і терасы. В тых днях реалізують ся роботы повязаны з іншталаційов першой части новой експозіції в інтерьєрі.

Перша етапа реконштрукції і модернізації вежі была зреалізована у 2021-ім році, цілковы кельчікы на тоту етапу были в сумі 200 тісяч евр. У 2022-ім році робили ся выглядковы куполы і тераса, як і стовп, а проінвестовало ся довєдна 1,2 міліона евр.

„Покля іде о комплетну експозіцію, затля сьме проінвестовали коло 80 тісяч евр, а іщі коло 40 тісяч проінвестуєме з тым, же то буде постоянна комплетна експозіція в трьох частях,“ доповнив Чапловіч.

Послідню етапу реконштрукції і модернізації вежі, включно выбудованя постоянной музейной експозіції у внутрішні части, Воєньскый історічный інштітут планує в марці 2024-го року. Роботы будуть дотуляти ся вонкашньой фасады і модернізації інтерьєру приземной части вежі. В третій етапі рахують з інвестіційов приблизно 240 тісяч евр.

Фото: TASR.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА