Початок русиньскых забав на Словациі

Русины, котры празднували Великден за григорияньскым календарьом, по долгым часі Великого Посту зберают ся орґанізувати по-пістны забавы. Найскорше зачынают Русины на полудне од Карпат, понеже більшіст з них обходит свята за новым стильом. Гулянок все барже намагают ся молоды як стары, зато і орґанізатором двох з реченых долов подій сут Молоды.Русины – русиньска молодіжна орґанізация з Братиславы.

В найблизшу суботу, 2. квітня/апріля т.р., Молоды.Русины просят на чергову 13. Русиньску забаву до Кошыц. До танця буде грала ґрупа просто з Чырча – Селект. Вступне то 15 €, але про членів орґанізациі Молоды.Русины є знижка о 50%. В ціні білетів, котры мож резервувати через інтернет (за тым мотузком) – закускы та напиткы. Більше інформаций найдете гев.

Дальшом забавом, котра одбуде ся в віторок, 5. квітня/апріля т.р., буде Руснаковиця. То радше дискотека про молодых Руснів, але як заявляют орґанізаторы, радо можут в ней взяти участ і приятелі молодых Руснаків та другы гості. Подія пройде в клюбі Ретро в Кошыцях. Музыку буде міксувал DJ Мілан Кнапік.

Другом забавом, орґанізуваном Молодыма.Русинами, буде 15. Русиньска забава в Братиславі. Подія одбуде ся 7. мая т.р., в просторах Дому Культуры Зркадлови Гай о 19.00 год. Забаву заграт ґрупа Проблем, але попри тым будут Вас бавити і Фольклорний Ансамбль Рутенія та Народна Музыка Рутенія, котры представлят дашто нове зо свого репертуару. Вступне то 20 €, а в тым напиткы і дашто до прекушыня на тепло. Вчас забавы буде про пристуных зрыхтувана і лотерия. Білеты можете резерувати за тым мотузком уж од 1. квітня/апріля т.р. Більше інформаций – гев.