Поход вдякы із Дуклі до Чертіжного

Шпортовый клуб Кычара і село Чертіжне в окресі Міджілабірці і того року орґанізують вже 24-ый річник Походу вдякы Дукля – Чертіжне, котрый проходить на ліжах. Як староста села Чертіжне Петро Тірчак інформовав словацькый денник Korzár, поход є напланованый на першу фебруарову суботу, значіть 4-го фебруара 2017-го року.

Про участників є із Чертіжного забеспеченый автобус, котрый піде рано на Дуклю. Там участны положать вінці і проявлять почливость похороненым воякам, котры впали за свободу в рамках Карпато-дукляньской операції.

По пєтнім акті буде слідовати поход на ліжах. Драга є довга 18 кіломатрів і веде по словацько-польскій граніці. Перед кінцьом походу буде приготовлене курте заставліня, де собі можуть турісты приготовити мале обчерствіня. Тото не буде браковати ани в сельскім културнім дому в Чертіжнім, де ся подія закінчіть.

За словами старосты Тірчака, люди подію оцінюють і каждым роком на ній бере участь векша кількость. Влони подія про брак снігу не одбыла ся, но перед двома роками пришло 120 участників.  Реґістрацію на суботній проход заперають орґанізаторы 2-го фебруара.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА