Політик Томаш Міхаловскій гостьом сесиі Рады Ґорлицкого Повіту

В четвер, 28. січня/януара 2021 р., одбыла ся XXIIІ сесия Рады Ґорлицкого Повіту. Єдным з гости беручых участ в сесиі был Томаш Міхаловскій, шеф Політичного Ґабінету Віцепремєра Ярослава Ґовіна.

Вчас свого выступліня передал він інформацию, што серед бенефінциєнтів проґраму підпоры для гірскых ґмін нашли ся ґміны з обшыри ґорлицкого повіту: Устя Рускє, Санкова, Ропа, Лужна, Липинкы, ґміна Ґорлиці і Місто Ґорлиці. Середкы можут быти схоснуваны на туристичны і комунальны інвестициі: м.ін. туристичны пути, паркы, видоковы пункты, паркінґы, скансены, музеі, дорогы, тротуары і канализацию. Поінформувал, же высокіст підпоры буде залежна од выдатків, якы дана ґміна понесла на інвестициі в роках 2016-2020.

Томаш Міхаловскій передал і інформациі для війтів і бургомайстрів з терену ґорлицкого повіту тыкаючы закону «локаль за ґрунт», якій входит в склад рынковой части мешканьового пакєту. Закон має заохотити самоуряды шырше анґажувати ся в активности для розвитку будівництва, хоснуючы склад ґмінных нерухомости. Закон «локаль за ґрунт» має дати доступ до ґрунітв, котрых властителями сут ґміны. Інвесторы будут мочы придбати нерухомости од ґмін з частичным розрахуваньом іх ціны мешканями або інчыма локалями, якы можут служыти самоурядовым спільнотам. Закон был підписаный президентом. Вчас стрічы Томаш Міхаловскій задеклярувал свою поміч вшыткым самоурядам за посередництвом старосткы Мариі Ґубалы.

Вчас обрадуваня Рада Ґорлицкого Повіту запознала ся з Інформацийом Служб, Інспекциі і Стражы, яка тыкат діянь в борбі з наслідствами Covid-19, та зо справописами з діяльности выділів Староства за 2020 рік. Рада підняла два схваліня: про затверджыня справописів з діяльности Комісиі Рады Ґорлицкого Повіту за 2020 рік та ґрунтову продаж в Маластові. Рада запознала ся тіж з інформацийом Заряду Повіту.