Зо смутком інформуєме, же двоязычна таблиця в селі Ріпкы на Лемковині остала знищена через незнаного справцю. Напис «Ropki – Ріпкы» є писаний в польскым та лемківскым языках. Лемківска част назвы місцевости остала замалювана синьом фарбом.
Інцидент тот, то не лем нарушыня записів Уставы з дня 6. січня/януара 2005 р. про нацийональны та етнічны меншыны і реґіональний язык, але тіж нарушыня прав ґварантуваных м.ін. лемківскій етнічні меншыні в Конституциі ПР, Рамовій Конвенциі Рады Европы про охорону нацийональных меншын та Европейскій картi реґіональных або меншыновых языків. Попри тым, нищыня таблиц з назвами місцевости становит выкрочыня згідно з кваліфікацийом Кодексу Выкрочынь Пoльской Республикы.
фот. Оля Зюльковска; (за згодом фейбукового фанпейджу)
Згідно з арт. 12 уст. 7, розділу 2. Уставы з дня 6. січня/януара 2005 р. про нацийональны та етнічны меншыны і реґіональний язык, додаткова назва місцевости або фізийоґрафічного обєкту в языку меншыны може быти усталена на внесок рады ґміны. Власні на основі реченой уставы, Стоваришыня Лемківской Молодежы ЧУГА в Польщы выстарало ся о поставліня на Лемковині двоязычных польско-русиньскых таблиц з назвами сел. Перша з них была одкрыта 24. листопада/новембра 2008 р. в ґміні Ґорлиці для села Білянка. О три рокы пізнійше, 17. листопада/новембра 2011 р. в ґміні Устя Ґорлицкє (д. Рускє) введено 8 лемківскых назв місцевости для сел Бліхнарка, Ґладышів, Конечна, Кункова, Новиця, Реґєтів, Ріпкы та Ждыня.
На жаль, припадків нищыня лемківскых записів назв сел было більше. Перше парураз доходило до замалюваня ци цільковитого знятя таблиці з назвом села Білянка, а в жолтни/октобрі 2015 р. знищено таблицю в Реґєтові. О тій справі інформували сме м.ін. Департамент Реліґійных Вызнань та Нацийональных Меншын Міністерства Внутрішніх Справ і Адміністрациі ПР, адміністрацию ґміны Устя Ґорлицє та поблизкій комісарият поліциі.
фот. Богдан Пупчык
Коментарі