Польскє міністерство дефініює «остатніх Лемків»

29. мая 2015 р. на фейсбуковым фанпейджы Міністерства Середовиска Польской Республикы, в рамках ґрафічной сериі афішів, інформуючых о нацийoнальных парках в Польщы, явила ся інформация о Маґурскым Нацийональным Парку, в котрым посеред долин і лісів, разом з карпатскыма рысями (лат. Lynx lynx carpathica) і дикыма котами (лат. Felis silvestris), жыют остатні Лемкы (мад. Lemkók, швед. Lemker, білорус. Лемкі, нім. Lemken).

Тота міністерияльна теза ідеальні пасувала бы до голосів, котры являли ся по оголошыню в листопаді 1994 р. урядового документу о основаню парку, же єдном з причын його одкрытя єст забезпечыня державной власности перед одданьом той обшыри лемківскым властителям, выгнаным, обдертым з чести, окрадженым з добытку (хыжы, лісы, поля) і споневераным вчас проведеной комуністами Акциі «Вісла» в 1947 р., котра мала на ціли полну асиміляцию русиньского населіня, жыючого по пілнічній страні Карпат.

Мы віриме в тото, же Маґурскій Нацийональний Парк был оснований прото, жебы хоронити чудову, прекрасну природу того кавальчыка Лемковины. Віриме тіж, што писмо з протестом, котре неодолга вышлеме, остане з повагом приняте в Міністерстві Середовиска.