Голосник

«Порожній Ліс» з номінацийом до NIKE 2020

В віторок, 26. мая 2020 р., были оголошены номінуваны до тогорічной літературной нагороды NIKE 2020. Першый раз, з причыны епідеміі, листа номінаций была запрезентувана лем в медиях. В нормальных обставинах номінуваных познали бы сме вчас плянуваных Варшавскых Торгів Книжкы.

Фіналистів оцініня познаме в вересни/септембри текучого рока. Лавреат буде оголошеный 4. жолтня/октобра. Номінацию до той престіжной літературной нагороды отримала книжка Монікы Шнайдерман під назвом «Порожній Ліс» (“Pusty Las”). То по части нобілітация для нашой соспільности, понеже книжка оповідат о діях на Лемковині.

В Волівци бывало ріжні

Книжка Монікы Шнайдерман оповідат о довоєнній Лемковині, точнійше – о Волівци, што находит ся в єй середній части. Авторка веде нас в подорож по давным світі, котрый давно тому проминул.

Шнайдерман, котра прожыват в Низкым Бескіді, представлят жытя серед зруйнуваных церкви, дикых садів, вказує врастаня в осироченый краєвид і чытаня світа по бывшых жытелях, Русинах. Книжка то так само істория авторкы о прожываню в Волівци, з котрого запоряд зникали глядаючы щестя за океаном Лемкы, Циґане та Жыды, а при тым єст то одданя пошаны для того місця на Лемковині, його істориі, для природы і жытелів.

Авторка описує епідеміі, якы мучыли цілый реґіон, антисемітскы погромы, першу і другу світовы войны. Споминат на переселіня, котры розшмарилы автохтонів на схід і захід од іх місця прожываня. Шнайдерман приводит вельо назвиск бывшых жытелів, приводит долю давных сусідів. Доказує тым, што має знаня про давный Волоцев. Вказує, што все є якісый слід. Книжку печатало выдавництво Чарне в 2019 р.

Найліпша книжка рока

NIKE то нагорода за найліпшу книжку рока. То єдно з найвеце престіжных літературных оцінінь в Польщы. Лавреат отримат 100 тис. зл і статую.  Того рока до нагороды номінуваных єст двадцет публикаций, в тым «Порожній Ліс».

Старчыт спомнути, што дотля лавреатами были такы особы як Чеслав Мілош, Ольга Токарчук, Єжы Пільх, Мариюш Щыґєл ци Вєслав Мыслівскій.

Оцініня першый раз было признане в 1997 р. Цілю нагороды єст пропомоция польской сучасной літературы, з притиском на популяризацию повісти.  Фондаторами Літературной Нагороды NIKE є Ґазета Выборча та Фонд Аґоры.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі