Посол Януш Ковальскій хоче знести выборчу привілегію для німецкой меншыны

Вчера, в понедільок 25. вересня/септембра перед сідибом Соспільно-Культурного Товариства Німців на Опольскым Шлеску віцеміністер рільництва Януш Ковальскій задеклярувал, што зложыт проєкт уставы, котрый буде ліквідувал привілегію німецкой меншыны в Польщы. «Тверде зобовязаня! Рішуче НІ для неуправненой выборчой привілегіі для німецкой меншыны!» – апелювал посол.

Януш Ковальскій, посол Суверенной Польщы, стартує з опольского округу. З того самого округу выбераны сут передставникы німецкой меншыны, котра як єдына хоснує привілегію, подля котрой меншыновый комітет не мусит перекрочыти 5-процентового выборчого порогу в скали державы, але уж в приміри самого евентуального поділу мандатів Выборчый Комітет Выборців Німецка Меншына мусит перекрочыти тот поріг в выборчым округу, в котрым стартує.

Посол Ковальскій заповіл, што зробит вшытко, жебы уж на першым реґулярным засіданю Сойму приняти уставу, котра знесе выборчу привілегію для німецкой меншыны. Ковальскій пояснял, што є то важне з причыны голосуваня Ришарда Ґаллі, посланця Німецкой Меншыны. Подля Ковальского посол німецкой меншыны мал голосувати проти польскій безпеці. Іде о голосуваня в справі муру на польско-білорускій граници.

«Не може быти так, же голос на нацийональну меншыну важыт веце»

Привілегія, котра не подабат ся посланцьови Ковальскому, не тыкат єднак лем німецкой соспільности в Польщы. Подля 197 артикулу Выборчого Кодексу комітеты нацийональных і етнічных меншын не мусят в выборах перекрочыти 5-процентового выборчого порогу в скали державы. Подля посла Ковальского тот запис є незгідный з Конституцийом і хоче го раз на все выкрислити.

«Голос каждого Поляка мусит важыти тілько само. Не може быти так, же голос на нацийональну меншыну важыт веце в тым розумліню, же тот комітет є вільный од выборчого порогу. То неупарвнена привілегія» – бесідувал посол Ковальскій.

«Німецка Меншына в тій каденциі Сойму вказала, што не знат поперти Польщы в важных справах, в тым квестиі безпекы на польско-білорускій граници ци напр. одбудовы Саского Палацу або воєнных репараций» – вычыслял Ковальскій. «Зато ниякій уряд не може вісіти на волоску нацийональной меншыны, котры в основных справах можут быти нелояльны взглядом інтересів Польщы. Тілько прав для німецкой меншыны в Польщы, кілько прав для польской меншыны в Німцьох» – перорувал посол.

Під конец конференциі до посла звернула ся єдна з жен. «Не єст вам ганьба, пане посол? Бы сте ся ганьбили, люде жыют гев од поколінь. Никому не перешкаджаме, сме гев зжыти зо вшыткыма людми. Матір, отец, повинны ся за вас ганьбити. Оставте тых люди» – бесідувала в емоциях жена. Фільм з награньом удоступнил на своім Твітері посол Ришард Ґалля. Жена задала послови основне звіданя в квестиі симетриі прав для німецкой меншыны в Польщы і польской меншыны в Німцьох. «Ци в Німцьох сут польскы терены?» – звідала. Посол Ковальскій не дал на тото одповіди.

Під вписом Ришарда Ґаллі на Твітері зачала ся дискусия. Посол Ковальскій написал, што подля него посол Ґалля бесідує голосом Берліна, а не Варшавы.

Фот. Твітер Януша Ковальского