Премєра моноґрафіі пн. Специяльна Акция «Вісла»

25. квітня/апріля т.р. в книгарни Лібра ПЛ в Ряшові буде проходила стріча з проф. Яном Пісуліньскым, автором моноґрафіі Специяльна Акция «Вісла».

Проф. др габ. Ян Пісуліньскій є кєрівником Закладу Найновшой Істориі в Інституті Істориі Ряшівского Університету. Написал більше як 60 науковых публикаций, котры головні ся тыкают польско-украіньскых односин.

Книжка Специяльна Акция «Вісла» вказує ся в 70. річницю проведіня найвекшой повоєнной мілітарной операциі польского войска. По II Світовій Войні комуністичний уряд Польщы старал ся зреалізувати плян моноетнічной державы. Ярю 1947 р. Операцийна Ґрупа «Вісла» зачала в полудньово-східній части Польщы найвекшу по войні акцию, звану специяльном акцийом «Вісла», цілю котрой была ліквідация украіньского підземля. Проведено примусове переселіня жыючого на тій обшыри населіня, не лем украіньской, але тіж лемківской і русиньской, на понімецкы землі пілнічной і західньой Польщы. Товдышній уряд мал на ціли знищыти нацийональне, соспільне і культурне жытя Лемків, не дозволити плекати материньскій язык, цілком одобрати хыжы, лісы, землю і соспільний маєток Лемків. Окрем того довести до асимілюваня Русинів в векшыновым, чужым населіню. Пару тисячів осіб поневолено в Центральным Лаґрі Працы в Явожні.

Проблематика операциі «Вісла» од років родит вельо емоций, але до днес не возникла праца, котра заняла бы ся том темом комплексово. Выданы дотепер збіркы документів лем по части выполняют тоты бракы. Розправа Яна Пісуліньского є першом моноґрафійом акциі «Вісла» полністю описуючом ведены в єй часі выселенчы і мілітарны діяня проти украіньскым оружным уґрупуваням. Праца была приготовлена на основі шырокой аналізы джерел, як тіж точной кверенды так польской, як і заграничной літературы. Автора уж скорше занимала тема выселінь Украінців, але тіж Лемків і Русинів до Совітского Союза, котры проходили в роках 1944-1946 р. Книгу збогачено о барз цінны, часто перший раз публикуваны фотоґрафіі зо збірок НЦА, ЦВА, ІНП, але тіж з приватных колекций.

Премєра книжкы пройде о 17.00 год. в книгарни Лібра ПЛ, котра містит ся на ул. Яґєльоньскій 14 в Ряшові. Вчас стрічы буде мож придбати книжку в промоційній ціні.