В Дебрецині посвятили зреконштруованый катедралный собор

У торжественній атмосфері в суботу 3-го октобра 2026-го року одбыло ся посвячіня Ґрекокатолицького катедралного собору Покровы Пресявтой Богородіці в Дебрецині, котрый є митрополітнов катедралов.

Катедралный собор Гайдудороґской архієпархії перешов великов реконштрукційов, котра почала іщі в 2023-ім році. Роботы проходили як в інтерьєрі храму, так і в екстерьєрі.

Головным служытельом патріарха

Головным служытельом на тім вызначнім торжестві быв Блаженішый Юссеф Абсі – мелкітьскый ґрекокатолицькый патріарха Антіохії і цілого Востоку, Александрії і Єрусалима. Вєдно із ним служыли і далшы єпіскопи.

Із домашніх єпіскопів брали участь вшыткы трьоми, голова Ґрекокатолицькой митрополітной церькви в Мадярьску Высокопреосвященый владыка Філіп Кочіш, архієпіскоп митрополіта гайдудороґскый, далше мішколцьскый єпарха кір Атаназ Орос, як і ніредьгазьскый єпарха кір Авел Сочка.

Участь брали головно єпіскопи русиньской церьковной традіції. Із Словакії были участны Высокопреосвященый владыка Йона Максим – пряшівскый архієпіскоп митрополіта і голова Ґрекокатолцькой церькви на Словакії, Высокопреосвященый архієпіскоп Кіріл Василь – кошыцькый єпарха, і кір Мілан Лах – братіславскый єпарха.

На суботнім торжестві взяв участь і Высокопресовященый владыка Вілъям Скурла – піттсбурзьскый архієпіскоп митрополіта, Преосвященый владыка Теодор Мацапула – мукачовскый єпарха, кір Василе Бізоу – марамурешскый єпарха із Румунії, Преосвященый владыка Кеннет Новаківскый – правлячій єпіскоп Лондоньской єпархії Пресвятой родины Україньской ґрекокатолицькой церькви і єдночасно апостольскый візітатор про Українців в Ірландії і Северній Ірландії, як і архієпіскоп Джорджо Деметріо Ґалларо – бывшый секретарь Дікастерії про восточны церькви в Римі, але і далшы єпіскопи як ґрекокатолицькы, так і римокатолицькы.

Проповідь почас торжественной архієрейской літурґії тримав мішколцьскый єпарха кір Атаназ Орос. На кінцю приговорив ся участным і Высокопреосвященый владыка Філіп Кочіш, голова Ґрекокатолицькой церькви в Мадярьску.

Катедрала має веце як сто років

Дебрециньскый катедралный собор быв збудованый в неовізантійскім штілі подля проєкту Яноша Бобулы молодшого. Храм 22-го мая 1910 року посвятив владыка Юлій Фірцак, втогдышній мукачовскый єпарха.

Вызначным моментом быв 2015-ый рік, коли Дебрецин став центром архієпархії і центром митрополії, чім храм став катедралным собором Гайдудороґской архієпархії.

Храм, котрый має веце як сто років, перешов комплетнов реконштрукційов. Цілкова інвестіція представлює 2,5 міліарды форінтів (приблизно 6,79 міліона евр). Мадярьска держава дала на реконштрукцію 2 міліарды форінтів, решту забезпечіла Гайдудороґска архієпархія із властных джерел а пожертвовань од віруючіх.

Обнова не значіла лем технічну реконштрукцію. Літурґічны просторы дістали нову подобу, выникнув новый розпис на стінах, котрый одповідать візантійскій традіції, но фаховці єдночасно зреконштруовали і захованы части первістного розпису із періоду будованя храму.

Фото: Гадудороґска архієпархія.