Презентація книжкы о селі Голубине

Як інформовав Юрій Шиповіч, председа Русиньского културолоґічного клубу, 15-го юла 2023-го року одбыла ся в адміністратівнім домі села Голубине, на Підкарпатю, презентація книжкы Голубине і голубинці вже небіжкы авторкы Маргаріты Безик.

Авторка робила над книгов довгы рокы, а по їй смерти доробила публікацію дівка Маргаріты Безик – Іванна Дюлай. Книга о історії карпатьского села была выдана у 2022-ім році в Києві на 600 сторінках.

На презентації окрім домашніх жытелів брали участь і представителі Поляньской теріторіалной громады, священик голубиньской Ґрекокатолицькой церькви Успенія Пресвятой Богородіці – отець Іван Козар, а покликаны были і членове Русиньского културолоґічного клубу.

Єден із членів клубу, Маріан Токар, котрый є універзітным педаґоґом і заступником головы орґанізації, підкреслив велику важность написаня локалных історій сел підкарпатьского краю, акцентуючі, же з такых історій складать ся дале велика історія Підкарпатя.

„Почас послідніх 150 років Підкарпатя входило до складу дакілько державных і полодержавных утворінь. То унікатный трафунок нелем на Україні, але і в Европі. Зато і Підкарпатці зробили в собі тот тіп комунікатівного і толерантного чоловіка, котрый шыківно ся приспособить новым реаліям, без насилства і аґресій,“ повів Токар на презентації.

Членове Русиньского културолоґічного клубу подаровали родині Маргаріты Безик і містному фолклорному ансамблю Голубинська борона книгу Олґы Прокоп Русинські співанкы, і нове выданя културно-белетрістічного журнала Отцюзнина.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА