Здружіня інтеліґенції Русинів Словеньска в рамках ціклу під назвов Стрічі коло Дуная орґанізує презентацію книжкы „Andrej Gavula – Андрій Ґавула“ о жывоті і творчости інсітного скулптатора із Чабин од авторкы Данієлы Капральовой. Частьов проґраму, котрый одбуде ся дня 29-го октобра 2015 р. од 17.00 год. в Конґресовім центрі Высокошкольского інтернату Універзіты Коменьского Дружба в Братіславі, буде і презентація відеофілму о умелцьови од фотоґрафа Богуша Табака.
Народив ся Андрій Ґавула у 1940 р. в русиньскім селі Чабины, окрес Міджілабірці. Робив як рушньоводич на штреках Стащін, Гуменне, Бардейов, Стара Любовня і Пряшів. Різбарьству присвячать ся од 1998 р., коли вырізав першый Віфлеєм до церькви в роднім селі. Перед тым го іншпіровали саморосты, котры находив коло рікы Лаборець. По тім, што пішов до пензії, наповно присвячать ся коморній, но і монументалній деревяній скулптурі. Дотеперь зробив веце як 30 монументалных творів.
Данієла Капральова походить зо Снины. Народила ся 12-го януара 1959 р. В рр. 1974 – 1978 штудовала на новоодкрытім фотоґрафічнім одділіню Середньой умелецько-промысловой школы в Кошыцях. В рр. 1980 – 1985 штудовала на Універзіті Павла Йозефа Шафарика в Пряшові на Катедрі вытварной выховы. Од 1988 р. робила у Вигорлатьскім музею в Гуменнім, на ґалерійнім одділіню як кунстісторік, потім у Вигорлатьскій бібліотеці і в Музею модерного уменя Енді Варгола в Міджілабірцях як музейоедуколоґ. Тврочость Капральовой є зміряна на субєктівный документ. Выставлює дома і за граніцями. Того часу робить кураторку в кшателю в Снині.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА