Презентація русиньского уменя в Будапешті

12-го новембра 2022-го року одбуде ся в Салі ґрофа Мигаля Естергазія в будапештаньскім Каштелю Штефанія вже пятый рочник події під назвов Шедевры русинського умілства.

Орґанізаторами той події суть посланкыня Парламенту Мадярьска за русиньску меншыну Віра Ґіріц, Вседержавноє Русиньскоє Самосправованя, Вседежавноє Общество Русинув/Рутенув Мадярщины, Общество Русинськуй Културы і Фундація „За Русинув“.

На події будуть одпрезентованы різны области русиньской културы і уменя. Участны будуть годны посмотрити собі юбілейну выставу єдного із найвызначнішых нашых малярів Атаназа Фединця, выступати будуть оперный співак Золтан Дараґов, Анна і Марія Бан, Молодежный фолклорный ансамбель Русины і школярі мучоньской Ґрекокатолицькой основной школы святого Петра.

Головным покровительом русиньской події є заступник віцепремєр Мадярьска Жолт Шемєн, вєдно з ним покровительство взяли председа парламентной фракції Хрістіаньско-демократічной народной партії Іштван Шімічко, котрый на події і приговорить ся участникам, а посланкыня Віра Ґіріц.

Атаназ Фединець

Народив ся Атаназ Фединець (рр. 1936 – 2012) в Ужгороді в родині выдатного хірурґа Александра Фединця. Єднако як няньо і він выштудовав медицину на Ужгородьскій державній універзіті і став рентґенолоґом. Наперек выштудованій професії зачав занимати ся наперед фотоґрафійов, пак мальованьом.

Іншпіровали го старшы майстры, представителі русиньской підкарпатьской школы мальованя, Федор Манайло і Антон Кашшай, котрых особно знав. В художных кругах быв знамый під псевдонімом Фруці (підписовав ся так і на образы).

У 1980-ім році еміґровав до Мадярьска. Там актівно занимав ся мальованьом, быв членом Націоналного общества художників Мадярьска, Клубу художників Корвін і Общества художників імени Енді Варгола. У своїм властнім домі одкрыв ґалерію. Брав актівну участь на културных подіях русиньскых орґанізацій в Мадярьску.

Образы Атаназа Фединця были выставлены на многочісленных выставках в Мадярьску, на Підкарпатю, в Австрії, Німецьку ці Швеції.